Крысціна Ціманоўская: Больш права выказвацца я не аддам нікому

Спартоўка выказала сваё меркаванне пра сітуацыю ў краіне.

Беларуская лёгкаатлетка Крысціна Ціманоўская расказала пра сваё стаўленне да так званых выбараў 2020 года.

«Я была не згодна ні з вынікамі выбараў, ні з паводзінамі ўлады і выказалася ў інстаграме. За што тут жа патрапіла ў чорны спіс міністэрства. Далей лепей: званкі, пагрозы, забароны на выезды, пазбаўленне прэмій. Тады мне дакладна і зразумела растлумачылі: хочаш ехаць на Алімпіяду - маўчы. І я паслухалася. Так, непрыемна пра гэта пісаць. Але праўда ў тым, што я спалохалася, як і многія іншыя.

І так, я проста хацела бегчы на сваёй першай Алімпіядзе. Не ведаю, цяпер я думаю, што можа быць гэтыя мае гісторыі ў Токіё - гэта тое, што я збірала ўвесь год і тое, што так старанна ўтрымлівала ўнутры сябе. Таму што, фактычна, федэрацыя лёгкай атлетыкі і яе стаўленне да спартоўцаў - гэта тое самае, што і рэжым толькі ў міні-варыянце. Мне ж загадалі - маўчы, а то не паедзеш. І вось я даехала ж. Значыць, ужо магу, нарэшце, сказаць тое, што думаю.

З аднаго боку, яны адабралі ў мяне алімпійскую мару і мае 200 метраў, але з іншага боку, сваімі дзеяннямі, сваёй жорсткасцю і абразамі вярнулі мне права выказвацца. І больш я яго не аддам нікому», - напісала Ціманоўская у сваім Instagram.