Каманда Навальнага выпусціла расследаванне пра кіраўніка МЗС Расеі Сяргея Лаўрова

Яхты, падарункі ад алігарха Дзерыпаскі і многае іншае.

Журналісты «Важных историй», а потым і следчыя ФБК Навальнага прысвяцілі артыкул міністру замежных спраў Сяргею Лаўрову. У Лаўрова сярод расейцаў рэпутацыя прыстойнага палітыка. Таму яго паставілі на вяршыню спісу партыі «Адзіная Расея» на выбарах у Дзярждуму. Журналісты руйнуюць міф пра прыстойнасць.

Следчыя сцвярджаюць, што Лаўроў жыве падвойным жыццём. Знаходзіцца 50 гадоў у афіцыйным шлюбе, а напраўду ў яго таемная другая сям'я, палюбоўніца Святлана Палякова, заваленая дарагімі аўтамабілямі і элітнай нерухомасцю ў Маскве, Падмаскоўі і Лондане.

21-гадовая падчарка Лаўрова, дачка Паляковай, жыве ў Лондане, у суперэлітным раёне, у кватэры за 4,4 млн фунтаў.

Сям'я Лаўрова і нават яго далёкія сваякі лётаюць у службовыя камандзіроўкі разам з Лаўровым, хоць не працуюць у МЗС.

Але галоўнае, гэта дачыненні з алігархам Алегам Дзерыпаскам. «Лаўроў і яго сям'я шмат гадоў знаходзяцца на ўтрыманні ў алігарха. Ён аплачвае ім адпачынак. Яны лётаюць на яго самалётах. Яны плаваюць на яго яхце і жывуць у яго дамах», - сцвярджаюць следчыя.

Узамен Лаўроў лабіруе інтарэсы Дзерыпаскі: дапамагаў атрымаць амерыканскую візу, а калі ў кампаніі Дзерыпаскі ўзнік канфлікт з уладамі Гвінеі, Лаўроў паляцеў туды вырашаць пытанне і дамогся свайго. Калі заходнія краіны ўвялі супраць Дзерыпаскі санкцыі, Лаўроў устаў на абарону алігарха. «Лаўроў гатовы і сусветную вайну развязаць дзеля спонсара сваёй сям'і, зрабіўшы ўсіх расейцаў закладнікамі інтарэсаў Дзерыпаскі», - пішуць следчыя.

«Іх сапраўднае жыццё - гэта другія сем'і, яхты, самалёты і палацы. Каралеўскае гламурнае жыццё за кошт алігархаў. Вось ідэалогія Пуціна. Гэта павінна быць напісана на плакатах «Адзінай Расеі», - рэзюмуе ФБК.