«Паднімуць падатак - значыць, мы падымем кошты»

Што будзе з беларускімі аграсядзібамі?

Не паспелі набыць моц адны змены ў падатковае заканадаўства Беларусі, як у сетках ужо актыўна абмяркоўваюць чарговыя магчымыя новаўвядзенні. Напрыклад, гаворка ідзе аб павелічэнні сумы збору для аграсядзібаў - у 6,5 разы. Што будзе з бізнэсам, калі гэта сапраўды адбудзецца, Intex-press даведалася ва ўладальнікаў сядзіб у Баранавіцкім раёне.

Апошнія змены ў Падатковым кодэксе, якія тычацца аграсядзібаў, набылі моц 1 студзеня гэтага года. Разавы штогадовы збор, які прадстаўнікі гэтага бізнэсу павінны плаціць дзяржаве за магчымасць працаваць, павялічылі з адной базавай адзінкі да дзвюх.

Але на днях у інтэрнэце зноў загаварылі аб магчымым падвышэнні падаткаў для аграсядзібаў. Прычым куды больш сур'ёзным. У пацверджанне ў сетцы быў апублікаваны праект дакумента, які нібыта ўносіць адпаведныя змены ў дзейны падатковы кодэкс. Варта адзначыць, што на Нацыянальным прававым партале такога праекта закона няма, таму невядома, ці існуе ён наогул. Аднак інфармацыя, якая змяшчаецца ў дакуменце, мела эфект бомбы, што выбухнула, бо там было сказана, што з 2022 года сума збору для ўладальнікаў аграсядзібаў вырасце ў разы: з 58 рублёў за год да 31 рубля штомесяц (гэта значыць, да 372 рублёў на год).

«Калі падымуць падаткі, частка невялікіх аграсядзібаў закрыецца»

<>/b

Хоць афіцыйна нідзе ні пра якія магчымыя змены ў падатковым заканадаўстве не гавораць і не пішуць, уладальнікі практычна ўсіх аграсядзібаў, з якімі нам удалося пагаварыць, пра іх чулі. І многія з іх упэўненыя, што, «калі падаткі падымуць, частка аграсядзібаў закрыецца».

- Аграсядзібны бізнэс вельмі затратны. Увесь час патрэбныя нейкія рамонты, а гэта выдаткі на камунальныя выплаты, аплату працы наёмных рабочых. Нешматлікія сядзібы могуць гэта фінансава вытрымаць, - распавядае адзін з уладальнікаў. - Я думаю, калі падымуць падаткі, частка невялікіх аграсядзібаў закрыецца.

Гаспадар адной з «маладых» сядзіб у Баранавіцкім раёне, зрэшты, адзначыў, што калі збор «будзе 1000 рублёў на месяц, то, напэўна, закрыцца давядзецца».

«Паднімуць падатак - значыць, мы падымем кошты»

Прадстаўнікі больш буйнога бізнэсу настроены захаваць яго ўсімі спосабамі. Яны кажуць, што, калі сумы збораў сапраўды значна вырастуць, ім давядзецца падняць кошты для наведвальнікаў.

- Паднімуць падатак - значыць, мы падымем кошты, але закрывацца я не збіраюся. Ведаеце, колькі я ўклаў грошай у сваю сядзібу? Я пабудаваў яе з нуля! Калі межы былі адкрытыя, у мяне чарга стаяла з замежнікаў. Дык няхай я хоць крыху буду іх адбіваць, хоць па капейцы, - заявіў адзін з уладальнікаў.

Мужчына ўпэўнены, што ахвотныя адпачыць знойдуцца ў кожным выпадку. Але сам факт узняцця стаўкі падатку, калі гэта сапраўды здарыцца, яго абурае.

- Мы стараемся падтрымліваць нашу культуру, наша дойлідства, а нас стараюцца прыкрыць. Але спыняцца мы не збіраемся, толькі наперад! - кажа ён.

Разам з тым ўладальнікі аграсядзібаў спадзяюцца, што размовы аб магчымым павелічэнні ставак збораў для аграсядзібаў - не больш чым чуткі. І пакуль ніякай афіцыйнай інфармацыі пра гэта не з'явіцца, яны маюць намер працаваць, як і працавалі.

- Пра тое, што мы будзем рабіць, калі падаткі падымуць, пакуль казаць рана, трэба паглядзець канчатковы, так бы мовіць, вынік, а потым ужо нешта думаць. Загадзя цяпер што паветра скалынаць? - рэзюмаваў адзін з суразмоўцаў.