СБУ паказала відовішчнае відэа антыдыверсійных вучэнняў на мяжы з Расеяй
1- 17.09.2021, 15:54
- 7,386
Відэафакт.
Служба бяспекі Украіны правяла ў Чарнігаўскай і Сумскай абласцях маштабныя тактыка-спецыяльныя вучэнні для нейтралізацыі варожых дыверсійных груп, піша unian.net.
Як паведамляе прэс-цэнтр СБУ, у мерапрыемствах было задзейнічана больш за 1,5 тысячы чалавек і звыш 100 адзінак тэхнікі, у тым ліку беспілотныя лятальныя апараты.
Адзначаецца, што трэніроўкі праводзілі ва ўмовах максімальна набліжаных да рэальных. Падчас вучэнняў быў узмоцнены рэжым бяспекі на вайсковых, інфраструктурных і іншых стратэгічна важных аб'ектах абодвух рэгіёнаў.
«Паводле легенды вучэнняў на тэрыторыю Чарнігаўскай і Сумскай абласцей пракралася ўмоўная дыверсійна-выведвальная група. Яны планавалі прычыніць дзяржаве значную эканамічную шкоду і дэстабілізаваць грамадска-палітычную абстаноўку ў памежных раёнах Украіны. Для выканання сваёй задачы «зламыснікі» спрабавалі зладзіць дыверсіі на некалькіх абаронных і прамысловых аб'ектах», - гаворыцца ў паведамленні.
Для выкрыцця і абясшкоджвання ўмоўнай ДВГ удзельнікі вучэнняў правялі комплекс аператыўна-вышуковых, контрвыведніцкіх і фільтрацыйных мерапрыемстваў.
«У заключнай фазе трэніровак спецназаўцы правялі паспяховую аперацыю па нейтралізацыі «дыверсантаў» у раёне памежнага пункта пропуску. Падчас затрымання «зламыснікі» надалі ўзброены супраціў», - распавялі ў СБУ.
У мерапрыемствах бралі ўдзел падраздзяленні СБУ, Дзяржпамежслужбы, Узброеных сіл Украіны, Нацыянальнай гвардыі, Дзяржслужбы ў надзвычайных сітуацыях, Нацыянальнай паліцыі, а таксама прадстаўнікі органаў выканаўчай улады і органаў мясцовага самакіравання.
Паводле інфармацыі СБУ, галоўнай мэтай вучэнняў стала павышэнне ўзроўню бяспекі ў памежных рэгіёнах Украіны. Акрамя таго, удзельнікі трэніровак адпрацавалі алгарытмы міжведамаснага ўзаемадзеяння для эфектыўнага процідзеяння магчымым тэрарыстычным і дыверсійным пагрозам.
У спецслужбе дадалі, што пасля заканчэння мерапрыемстваў іх арганізатары прааналізавалі ўзровень выканання пастаўленых задач. Таксама былі вызначаныя накірункі далейшага ўдасканалення парадку дзеянняў для прадухілення і нейтралізацыі пагроз дзяржаўнай бяспекі Украіны.