Лякарні сыходзяць на лячэнне COVID-19, але не ўсе: дзе ў Беларусі прымаюць каранавірусных хворых

Новая хваля афіцыйна прыйшла.

Тое, што ў Беларусь прыйшла чарговая хваля каранавіруса, ужо прызнанае на афіцыйным узроўні. У звычайнай менскай паліклініцы, дзе два тыдні таму, як гаворыцца, нішто не прадвяшчала бяды, калідоры каля кабінетаў тэрапеўтаў бітком забітыя пацыентамі. Хочацца верыць, што іх сюды прывёў уздым сезонных прастудных захворванняў, піша kp.by.

А вось знаёмая, якую на днях прааперавалі ў 1-й гарадской клінічнай лякарні Менска, распавяла, што пацыентаў аперавалі да ночы, каб паспець як мага хутчэй вызваліць месца - маўляў, лякарню закрываюць пад каранавірусных хворых. Ці так гэта?

- Шпіталь пачаў лячыць ковід, - пацвердзілі ў гэтай медустанове.

Аб перапрафіляванні іншых лякарняў пакуль вядома няшмат. У сталічнай інфекцыйнай лякарні сказалі, што пакуль працуюць у штатным рэжыме. Відавочна, у кожным індывідуальным выпадку трэба тэлефанаваць і ўдакладняць, ці можна цяпер трапіць да нейкага лекара або на платную паслугу. Напрыклад, адзін час, калі 10-я лякарня г. Менска была закрытая пад ковідных пацыентаў, афтальмалагічнае аддзяленне працавала.

Пра тое, што ў Магілёве некалькі медустаноў перапрафілююць праз ковід, распавёў БЕЛТА начальнік галоўнай управы аховы здароўя Магілёўскага аблвыканкама Аляксандр Старавойтаў:

- У абласным шпіталі медыцынскай рэабілітацыі рыхтуюць 150 месцаў для пацыентаў з каранавіруснай інфекцыяй. Таксама ў Магілёўскім абласным шпіталі інвалідаў Вялікай Айчыннай вайны адно аддзяленне выдзеленае пад рэабілітацыю пацыентаў, якія перанеслі пнеўманію, у тым ліку COVID-19. Усе астатнія ўстановы аховы здароўя працуюць у штатным рэжыме.

Чацвёртае «ковіднае» аддзяленне адкрылася 14 верасня ў Слуцкай цэнтральнай раённай лякарні - у рэгіёне за тыдзень на 17% вырасла захворванне на каранавірус.