Талібы скасавалі Міністэрства спраў жанчын і стварылі ведамства, адказнае за работу «паліцыі нораваў»

На будынку міністэрства ўжо вісіць таблічка з новай назвай.

У Афганістане зараз няма Міністэрства спраў жанчын. Талібы прынялі рашэнне стварыць на яго базе Міністэрства прапаганды дабрачыннасці і прадухілення заган, інфармуе BBC.

На будынку міністэрства ўжо вісіць таблічка з новай назвай.

Варта адзначыць, што падчас папярэдняга праўлення «Талібану» ў Афганістане ўжо працавала такое ведамства. Яго асноўнай задачай было ўвядзенне захадаў рэлігійных дактрын, якія тычацца ісламскага парадку. Таксама міністэрства выпрацавала цэлы шэраг абмежаванняў, якія тычацца перш за ўсё жанчын. Яно адказвала за працу «паліцыі нораваў», якая сачыла за выкананнем нормаў шарыяту. Усе, хто парушаў правілы, зазнавалі строгія пакаранні. Іх лупцавалі, білі, ім ампутавалі канечнасці, або прыгаворвалі да публічных пакаранняў смерцю.

15 жніўня талібы ўвайшлі ў Кабул, і прэзідэнт Афганістана Ашраф Гані пакінуў краіну. Перад гэтым на працягу менш чым двух тыдняў «Талібан» узяў пад кантроль большую частку правінцый Афганістана.

Талібы арыштавалі экс-прэзідэнта Афганістана Хаміда Карзая, які вёў з імі перамовы аб пераходным урадзе, забаранілі музыку, забаранілі жанчынам працаваць і нават паказвацца на вуліцы без буркі і без суправаджэння мужчыны.

Апорай супраціву талібам зноў стала правінцыя Панджшар на поўначы краіны. Аднак 4 верасня талібы захапілі і гэтую правінцыю.