Сталі вядомыя падрабязнасці ДТЗ з расейскім спеваком Каем Метавым у Беларусі

У спевака быў запланаваны канцэрт на лукашысцкім свяце ў Гародні, але туды артыст так і не даехаў.

Расейскі спявак Кай Метаў у суботу, 18 верасня, павінен быў выступіць з канцэртам у Гародні. Мерапрыемства павінна было адбыцца на цэнтральнай плошчы горада. Але гэтага так і не адбылося. Па дарозе з Менска спявак трапіў у аварыю, піша kp.by.

Як паведамілі ва УУС, блізу шостай гадзіны вечару на 85 км аўтадарогі М6 Менск – Гародня кіроўца 1977 года нараджэння, кіруючы аўтамабілем «Таёта», рухаючыся ў напрамку Гародні, не ўзяў да ўвагі ўмовы надвор'я, не справіўся з кіраваннем і здзейсніў наезд на асвятляльную мачту, пасля чаго аўтамабіль апынуўся ў кювеце. Машына «атрымала механічныя пашкоджанні». Спявак быў дастаўлены ў лякарню.

Журналісты здолелі звязацца з прадстаўніком спевака, які займаецца арганізацыяй канцэртаў. На той момант ён змог расказаць, што пакуль не можа ніяк звязацца з артыстам.

У аварыю Кай Метаў трапіў напярэдадні свайго дня народзінаў – 19 верасня яму споўнілася 57 гадоў.

У нядзелю, 19 верасня, у сваім Інстаграме Метаў апублікаваў відэа з падзякамі, а таксама расказаў падрабязнасці ДТЗ.

– Вялікі дзякуй за ваша спачуванне, за ваш удзел, хваляванне, за вашы званкі. Са мной усё добра. Таксама ўсё добра з хлопцамі, якія былі разам са мной у машыне. Учорашні інцыдэнт, дзякуй Богу, паспяховы і ўсе жывыя. Сёння ў мяне дзень народзінаў, і я магу сказаць, што другі дзень народзінаў. У горада Гародні таксама быў дзень народзінаў. І там быў запланаваны мой канцэрт, але абставіны склаліся такім чынам, што на канцэрт я так і не прыехаў, – сказаў Метаў.

Паводле словаў артыста, аварыя адбылася на трасе Менск – Гародня з прычыны таго, што кіроўца аўтамабіля не змог справіцца з кіраваннем праз умовы надвор'я.

– На жаль, учора (гаворка ідзе пра 18 верасня – рэд.) на трасе Менск – Гародня здарылася ДТЗ. Кіроўца нашага аўтамабіля не справіўся з кіраваннем, надвор'е было нялётнае, ліў дождж і ўтвараліся лужыны. Вось адна з такіх лужынаў злавіла колы нашага аўтамабіля. Мы ехалі з прыстойнай хуткасцю. Мы крыху закранулі адбойнік, потым адляцелі направа, мы збілі слуп. Гэта, напэўна, дрэнна, але, з іншага боку, ён змог пагасіць хуткасць. У кювет мы ўсё роўна ўпалі, вядома, але не куляючыся, а юзам, – прывёў падрабязнасці артыст.

Ён дадаў, што беларускія службы выратавання спрацавалі вельмі хутка.

– Хацелася б падзякаваць службам выратавання Беларусі, якія вельмі хутка адрэагавалі на тое, што здарылася. Першае, што я пачуў ад афіцэра праз гучную сувязь – ён прасіў нас выйсці з машыны, праверыць, ці ўсё жывыя і цэлыя. Мы паведамілі каардынаты і патрульныя нарады хуткай дапамогі і міліцыі прыехалі цягам 10–15 хвілін. Але першымі да нас на дапамогу прыйшлі звычайныя беларусы, якія спынілі свае машыны і дапамаглі нам справіцца з першымі хвілінамі шоку, абагрэлі, пасадзілі ў свае аўто. Вялікі вам чалавечы дзякуй, – падкрэсліў спявак.

Метаў таксама выказаў словы падзякі медыкам, якія пераканалі, што ў Горадню на канцэрт трапіць не атрымаецца.

– Хацелася б падзякаваць лекарам, якія спынілі наш запал і далі зразумець, што ў Гародню мы не трапім, бо нам неабходна прайсці медыцынскае абследаванне. У суправаджэнні патрульных мы паехалі ў раённую лякарню, дзе нас абследавалі: зрабілі рэнтген, УГД. Лекары вельмі скрупулёзна нас агледзелі. Я напісаў адмову ад шпіталізацыі, напісаў адмову ад судова-медыцынскага абследавання, напісаў адмову аб пачатку крымінальнай справы супраць кіроўцы. Супрацоўнікі міліцыі з'ехалі толькі тады, калі атрымалі паперы з пячаткамі, што нашаму жыццю нічога не пагражае. Потым нас адправілі ў Менск, дзе яшчэ раз абследавалі. Тут я і сустрэў свой чарговы дзень нараджэння, – падсумаваў артыст.

Ён таксама заклікаў усіх быць пільнымі на дарогах, прышпільвацца рамянямі бяспекі ў машыне і берагчы сябе.

Кай Метаў – расейскі аўтар-выканаўца і кампазітар. Заслужаны артыст Расеі. У 1993 годзе выйшаў дэбютны альбом Position № 2 з аднайменнай хітом. У 2003 годзе ён напісаў песню «Ружа чайная» для дуэта Распуцінай і Кіркорава.