На «Палессеэлектрамашы» ў Лунінцы адбыўся выкід расплаўленага металу
2- 20.09.2021, 15:11
- 5,124
Пацярпелі два чалавекі.
У Лунінцы 19 верасня адбыўся выкід расплаўленага металу, паведамляе «Медиа-Полесье».
У выніку інцыдэнту пацярпелі два чалавекі. З тэрмічнымі апёкамі іх даставілі ў Лунінецкую раённую лякарню.
Намеснік дырэктара «Палессяэлектрамаша» ў ідэалогіі Георгій Мардухай факт здарэння і траўматызму дзвюх работнікаў пацвердзіў.
У абласной управе МНС паведамілі, што гарэння не было, падраздзяленні МНС не прыцягваліся.
Па факце траўмавання следчыя праводзяць праверку.
«Паводле папярэдняй інфармацыі, удзень 19 верасня падчас правядзення работ для пераплаўлення металалому ў цэху чыгуннага ліцця на адным з прадпрыемстваў у Лунінцы з гарлавіны печы адбыўся выкід распаленага металу. У выніку двое рабочых (40 і 50 гадоў) атрымалі апёкі рознай ступені цяжкасці ад трапляння на іх часціц распаленага металу і ўзгарання адзення», - паведаміў Следчы камітэт.
Такі выкід расплаўленага металу ўжо меў месца на прадпрыемстве ў 2017 годзе. Тады на ўчастку каляровага ліцця пры загрузцы алюмініевага лому ў печ таксама адбыўся выкід металу, плавільшчык атрымаў цяжкія тэрмічныя апёкі.