Кошт газу ў ЕЗ узляцеў вышэй за $900 на пастанове «Газпрома» ўтрая скараціць транзіт праз Польшчу

Імкліва скарачаць прапампоўванне «Газпром» пачаў у канцы ліпеня.

У панядзелак газавыя ф'ючэрсы з прывязкай да спотавых коштаў на нідэрландскім хабе TTF падскочылі на 13% і перавысілі адзнаку 900 даляраў за тысячу кубаметраў на пастанове «Газпрома» значна скараціць прапампоўванне праз Польшчу і адмовіцца ад рэзервавання дадатковых магутнасцяў украінскай ГТС, піша finanz.ru.

На чарговым аўкцыёне газатранспартных магутнасцяў еўрапейскай GSA Platform «Газпром» зарэзерваваў толькі 31,4 млн кубаметраў на дзень праз польскі калідор газаправода «Ямал-Еўропа».

Кампанія выкупіла толькі траціну ад выстаўленага на аўкцыён аб'ёму прапампоўвання на кастрычнік (89 млн кубаметраў на дзень). Гэта азначае - пастаўкі па трубаправодзе, які злучае Нямеччыну з радовішчамі Заходняй Сібіры, у наступным месяцы будуць практычна ўтрая ніжэйшымі, чым у пачатку лета (84 млн кубоў).

Імкліва скарачаць пампаванне «Газпром» пачаў у канцы ліпеня (з 84 да 50-60 млн кубаметраў), а затым зрэзаў яго яшчэ ў 2-3 разы на фоне аварыі на газападрыхтоўчым заводзе ў Новым Урэнгоі. Пастаўкі вярнуліся да звычайных аб'ёмаў (84 млн кубаметраў на дзень) пасля візіту ў Маскву канцлеркі ФРГ Ангелы Мэркель у канцы жніўня. Але цяпер зноў упадуць да мінімальных сёлета значэнняў.

Нічым скончылася спроба прадаць «Газпрому» дадатковыя транзітныя магутнасці праз Украіну. Кампанія пампуе 109 млн кубаметраў на дзень на падставе цвёрдага кантракту, падпісанага з Кіевам у канцы 2019 года. Да сярэдзіны лета «Газпром» рэзерваваў дадатковыя аб'ёмы (да 15 млн кубоў на дзень), але адмовіўся ад гэтай практыкі з верасня.

Такім чынам, у кастрычніку прапампоўванне газу ў ЕЗ па польскім маршруце скароціцца ўтрая, а па ўкраінскім - застанецца на 12% ніжэйшым, чым у першай палове года.

На 14.29 мск ф'ючэрсы на газ з пастаўкай у кастрычніку таргуюцца ў Лондане па 885,7 даляра за тысячу кубаметраў, а раней дасягалі 907,01 даляра.

Газ з пастаўкай у лістападзе каштуе 888,2 даляра за тысячу кубаметраў, у той час як на піку каціроўкі дасягалі 912 даляраў. Столькі ж каштаваў газ на снежань, перш чым адступіць да адзнакі 889,6 даляра.

Адставанне запампоўвання газу ў падземныя сховішчы (ПСГ) у Еўропе з'яўляецца вельмі вялікім, яго ўжо не нагнаць, таму Еўропа ўвойдзе ў асенне-зімовы сезон з дэфіцытам газу, заявіў у пятніцу кіраўнік «Газпрома» Аляксей Мілер.

Паводле яго ацэнкі, у ПСГ бракуе 22,9 мільярда кубаметраў, што абяцае еўрапейскім краінам новыя рэкорды коштаў газу.

«Цэны ў Еўропе пабілі ўжо ўсе магчымыя рэкорды. І, магчыма, нават яшчэ найбліжэйшым часам паб'юць і тыя, якіх ужо дасягнулі», - заявіў Мілер.

Жорсткая стратэгія «Газпрома» на працісканні хутчэйшага адабрэння шматпакутнага праекта «Паўночны струмень - 2» можа абярнуцца рызыкамі ў недалёкай будучыні.

І хоць цяпер у Еўропе дэфіцыт ЗПГ (яго пастаўкі ўпалі на 20% год да года), магутнасці ў вытворчасці звадкаванага газу ў свеце прадаўжаюць павялічвацца, і да 2025 года на рынак выйдзе блізу 100 млн тон дадатковай прапановы, ацэньваюць экспэрты Цэнтра энэргетыкі «Сколкава».

У «Газпрома» ж у 2025 годзе заканчваюцца буйныя доўгатэрміновыя кантракты, нагадваюць у «Сколкаве», і пытанне іх падаўжэння можа ўперціся ў дыскусію аб газавай залежнасці ад Расеі.