«Беларусы прачнуліся»: Беларуска з ЗША расказала, як падтрымала плюшавы дэсант

Мядзведзі з шоу Джона Олівера выклікалі ажыятаж у Амерыцы.

Тыдзень таму вядоўца папулярнага амерыканскага шоу Last Week Tonight with John Oliver зрабіў выпуск пра Беларусь. У канцы праграмы ён прапанаваў гледачам набыць плюшавых мішак, а грошы ад іх продажу паабяцаў накіраваць на падтрымку беларускіх незалежных СМІ і праваабарончых арганізацый. Дзесяць тысячаў цацак разабралі менш чым за 12 гадзінаў. Адна з іх паляцела ў Лас-Вегас да беларускі з імем Вера, піша zerkalo.io.

– Пасылка з цацкай мне прыйшла дні два таму (18 верасня. – Заўвага рэд.), – расказвае Вера. – Цікава, што шоу запісваецца ў Нью-Ёрку, а мішку мне даслалі з прадпрыемства, якое знаходзіцца ў Нью-Джэрсі.

Сама цацка, прадаўжае суразмоўца, зробленая ў Кітаі. У доме для яе ўжо адвялі адмысловае месца: мядзведзь будзе сядзець на працоўным стале гаспадыні.

– Для мяне гэтая цацка як памяць, што ў Амерыцы выйшла перадача, у якой расказалі пра тое, што адбываецца ў Беларусі. Вельмі важна, што гэта было шоу Джона Олівера, бо ў яго мільёны фанатаў, – адзначае Вера.

Вера родам з Гомеля. У ЗША яна пераехала ў канцы 1990-х. Цяпер жанчына жыве ў Лас-Вегасе і працуе ва ўніверсітэце. Шоу Last Week Tonight with John Oliver на НВО яны з мужам глядзяць вельмі даўно.

– У нядзелю ўвечары, калі яно пачынаецца, мы пакідаем усе справы і сядаем ля тэлевізара. А калі раптам не паспяваем, глядзім у запісе, – расказвае суразмоўца пра добрую сямейную традыцыю і прызнаецца: яна любіць палітычную сатыру і з'яўляецца вялікай прыхільніцай Джона Олівера. – Ён вядомы сваімі з'едлівымі жартамі. Аднойчы, па-мойму, жартаваў нават пра Паўночную Карэю. Я чакала, што ён падрыхтуе выпуск пра Лукашэнку. А калі гэта раптам здарылася, я была на піку эмоцый – і радая, і ўзбуджаная.

У канцы сваіх праграмаў, прадаўжае суразмоўца, Джон Олівер, як правіла, прапануе на нешта сабрацца. У выпадку выпуску пра Беларусь – гэта былі плюшавыя мядзведзі. Кошт аднаго – 20 даляраў. Вера замовіла яго адразу, як толькі скончылася шоу.

– Я хацела падтрымаць пасыл, які ішоў ад Джона Олівера, ягонае жаданне звярнуць увагу да таго, што адбываецца цяпер у Беларусі, – тлумачыць Вера, чаму набыла цацку. – Я разважала так: калі я гэта зраблю (закажу цацку. – Заўвага рэд.) і гэта падтрымаюць іншыя людзі, то акцыя атрымае большы рэзананс. А значыць, пра сітуацыю ў нашай краіне даведаюцца нават тыя, хто пра яе нічога не чуў.

Аформіўшы на мішку пасылку, Вера напісала пра гэта пост у адной з суполак беларусаў у ЗША. Назаўтра яна ўбачыла, што яе паведамленне перапосцілі блізу тысячы чалавек. У каментарах пад постам многія пісалі: «Мядзведзі скончыліся».

– Тыя, хто не паспеў замовіць цацку, не прапаноўвалі вам прадаць ім свайго мішку?

– Не, – смяецца суразмоўца. – Але я бачыла, што пад маім пастом некаторыя пісалі: «Хто замовіў некалькі, прадайце аднаго».

– А вы самі сачылі за падзеямі ў Беларусі пасля выбараў-2020?

– Калі я прыязджала ў Беларусь і мела зносіны з сябрамі, ніколі палітычныя тэмы не абгаворвалі наўпрост, – кажа суразмоўца. – І калі летась я ўбачыла, што адбываецца, была ў шоку. Я падпісалася на ўсе магчымыя тэлеграм-каналы і сачыла за навінамі. Чытала і думала: «Няўжо беларусы прачнуліся?»