Прэзідэнт Польшчы на Генасамблеі ААН высунуў жорсткія абвінавачванні супраць Лукашэнкі

Беларускі рэжым спрабуе стварыць штучны гуманітарны крызіс.

Прэзідэнт Польшчы Анджэй Дуда падняў тэму міграцыйнага крызісу на мяжы з Беларуссю, выступаючы ў аўторак на агульнапалітычных дэбатах 76-й сесіі Генеральнай Асамблеі (ГА) ААН, паведамляе прэс-служба польскага прэзідэнта.

Паводле ягоных словаў, Польшчы даводзіцца плаціць кошт падтрымкі, якую яна робіць беларускім грамадзянам у апошнія месяцы. Ён мяркуе, што адказам беларускіх уладаў на гэтую дапамогу «была нябачаная гібрыдная атака на мяжы Польшчы, Латвіі і Літвы – трох краінаў на ўсходнім флангу NATO і ЕЗ».

Як сцвярджае Дуда, беларускія ўлады «прывозяць у сваю краіну дзясяткі тысячаў катэгарычна настроеных жыхароў дзяржаваў Блізкага Усходу, якіх пад палкамі паліцыянты прымушаюць перасякаць межы, спрабуючы справакаваць штучны гуманітарны крызіс».

«Мы не адступім у гэтым крызісе, таму што мы не згодныя на інструментальны падыход да мігрантаў, на выкарыстанне іх складанага становішча ў якасці інструменту дзеянняў, накіраваных супраць бяспекі нашых межаў, межаў, якія мы абавязаныя абараняць, у тым ліку як краіна ЕЗ», – сказаў Дуда.

Анджэй Дуда таксама заявіў, што блізу 150 тысячаў беларусаў за апошні час атрымалі прытулак і працу ў ягонай краіне і заклікаў сусветную супольнасць да большай салідарнасці з беларусамі.

«Я кажу ўсё гэта як лідар краіны, дзе блізу 150 тысячаў беларусаў атрымалі прытулак і працу, у тым ліку тысячы пратэстоўцаў. Нядаўна я сказаў нашым беларускім братам, што яны вітаюцца і што Польшча будзе іх домам да таго часу, пакуль яны будуць меркаваць гэта мэтазгодным і неабходным. Я цвёрда прытрымліваюся гэтых словаў», – сказаў ён, выступаючы на Генеральнай Асамблеі ААН.

Анджэй Дуда адзначыў, што са жніўня мінулага года тысячы беларусаў выходзячы на мірныя акцыі пратэсту сутыкаліся з дубінкамі, слезацечным газам і нават кулямі. Таксама Дуда праінфармаваў Генасамблею аб прысудах, вынесеных Марыі Калеснікавай і Максіму Знаку і нагадаў пра прадстаўнікоў польскіх меншасцяў, затрыманых беларускімі ўладамі – Анжаліку Борыс і Анджэя Пачобута.

Ён запатрабаваў іхняга вызвалення і заклікаў міжнародную супольнасць да большай салідарнасці з беларускім народам.

«Мы патрабуем іхняга вызвалення і большай салідарнасці міжнароднай супольнасці з народам Беларусі, які проста хоча сумленнай дзяржавы, сумленнай дэмакратыі», – сказаў ён.