Прэзідэнт Еўрапейскага студэнцкага звязу звярнулася да міністра адукацыі Беларусі
3- 22.09.2021, 19:26
- 5,128
Прэзідэнт ESU запатрабавала спыніць палітычны пераслед студэнтаў, навукоўцаў і выкладчыкаў.
Прэзідэнт Еўрапейскага студэнцкага звязу (ESU) Марціна Дарманін звярнулася з лістом да міністра адукацыі Беларусі Ігара Карпенкі і дырэктара Інстытута генетыкі і цыталогіі НАН Беларусі Руслана Шайко, з якога звольненыя амаль усе сябры свабоднага прафзвязу, паведамляе naviny.online.
Як паведамляе тэлеграм-канал Задзіночання беларускіх студэнтаў, ESU, які прадстаўляе інтарэсы больш за 20 мільёнаў навучэнцаў ВНУ, патрабуе вызвалення ўсіх палітычных зняволеных студэнтаў, аднаўлення незаконна адлічаных, аднаўлення на працы звольненых выкладчыкаў і навукоўцаў. Акрамя гэтага, арганізацыя выказвае салідарнасць з вольнымі прафзвязамі і Задзіночаннем беларускіх студэнтаў.
ESU нагадвае, што Беларусь абавязаная выконваць падпісаныя ёй дамовы з Міжнароднай арганізацыяй працы і стандарты, дэклараваныя ў рамках Балонскага працэсу. Яны ўключаюць у сябе свабоду самакіравання ва ўніверсітэтах, права на стварэнне прафесійных звязаў і свабоду ад пераследу за перакананні - што ў Беларусі цяпер не выконваецца.
Напрыканцы, Марціна Дарманін патрабуе пакласці канец палітычным пераследам студэнтаў, навукоўцаў і выкладчыкаў, а таксама ўступіць з імі ў рэальны дыялог.