У Расеі спынілі вытворчасць папулярнай вакцыны «КовіВак»

Чаму?

Вытворчасць вакцыны «КовіВак», якая з самага пачатку яе выкарыстання карысталася вялікім попытам сярод расейцаў, на час прыпынілі. Прычына гэтага акурат у высокім попыце - вытворчая пляцоўка будзе мадэрнізавацца з мэтай маштабавання выпуску вакцыны, паведамляе ВВС.

Што гэта значыць для расейцаў і ці справакуе гэта дэфіцыт вакцын?

«КовіВак» не паступае ў абарачэнне з канца жніўня, піша «Коммерсантъ» у чацвер, 23 верасня. Згодна з выяўленым выданнем звестак у рэестры Раснагляду ў ахове здароўя, з 28 жніўня да 22 верасня партыі вакцыны ў абарачэнне не ўводзіліся, хоць раней выпускалася 30-90 тысяч доз на месяц.

Выданне падлічыла, што з моманту рэгістрацыі прэпарата ў лютым гэтага года і да сярэдзіны жніўня было выпушчана не больш за 1 млн доз. Цэнтр не ўводзіць у абарачэнне новыя серыі праз прыпыненне пляцоўкі для вытворчасці сыравіны для прэпарата, піша выданне са спасылкай на крыніцы.

Пазней у чацвер цэнтр Чумакова патлумачыў прыпыненне выпуску вакцын «мадэрнізацыяй вытворчасці», якая, са слоў гендырэктара цэнтра Айдара Ішмухаметава, дасць магчымасць нарасціць магутнасці ў 2-2,5 разы. З ягоных слоў, у грамадзянскае абарачэнне выпушчана ўжо 1,5 млн доз і плануецца да канца года выпусціць яшчэ за 2,5 млн доз, а вытворчасць вакцын на новым абсталяванні ўжо пачалася.

Намесніца дырэктара Цэнтра імя Чумакова Кацярына Кардубан заявіла «Медузе» *, што вытворчасць «КовіВака» спынялася толькі на тры тыдні ў жніўні. Паводле яе слоў, гэта было планавае прыпыненне для ўстаноўкі новага абсталявання.

Партнёру цэнтра ім. Чумакова, «Наналеку» Уладзіміра Хрысценкі, давялося адкласці масавую вытворчасць «КовіВака». У кампаніі «Коммерсанту» паведамілі, што затрымка пачатку выпуску вакцыны звязаная ў тым ліку з рэканструкцыяй у цэнтры Чумакова. Там сказалі, што пачнуць вытворчасць не раней за канец восені. 18 верасня выданне Vademecum паведамляла, што «Наналек» пакуль не скончыў трансфер тэхналогіі вытворчасці вакцыны, бо сутыкнуўся з цяжкасцямі, звязанымі з пастаўкамі абсталявання.

У ліпені планавалася, што за 2021 год цэнтр выпусціць да 10 млн доз вакцыны, з якіх 3 млн павінен быў вырабіць «Наналек». Пакуль усе стадыі вытворчасці, уключаючы кантроль якасці, «КовіВак» праходзіў на тэрыторыі цэнтра Чумакова ў паселішчы Маскоўскім у Новай Маскве.

Ажыятажны попыт на вакцыну

У Маскве, Санкт-Пецярбургу і іншых расейскіх рэгіёнах рэгулярна заканчваўся «КовіВак». Вакцына стала карыстацца ажыятажным попытам, прычыны якога, як казалі экспэрты ў гутарцы з ВВС, у рэпутацыі навуковага цэнтра даследаванняў і распрацоўкі імунабіялагічных прэпаратаў ім М.П. Чумакова, мінімальнай рэактагеннасці вакцыны (меней выяўленыя запаленчыя пабочныя эфекты), а таксама старой і добра вывучанай тэхналогіі вытворчасці - інактывацыі віруса.

Расейскія лекары часта рэкамендавалі «КовіВак» людзям з алергіяй і хранічнымі захворваннямі, а таксама для рэвакцынацыі.

Старая тэхналогія стала адначасова і прычынай вытворчых абмежаванняў для «КовіВака»: справа ў тым, што для працы з жывым вірусам неабходная адпаведная ліцэнзія, якой валодае абмежаваная колькасць лабараторый у краіне.

Абмежаванні ў вытворчасці стварылі дэфіцыт вакцыны, праз што ў некаторых стварылася памылковае ўражанне, што гэтая вакцына больш запатрабаваная ці больш якасная. Аднак пакуль дакладных звестак аб эфектыўнасці «КовіВака» няма.

24 жніўня гэтага года ў замежным выданні Emerging Microbes&Infections выйшла даследаванне «КовіВака», праведзенае на мышах, хамяках і прыматах.

Першая навуковая публікацыя па «КовіВаку»: асноўныя высновы

Даследчыкі прыйшлі да высновы, што для жывёл вакцына не таксічная, нават калі ўводзіць яе шматкроць. «Вакцына выклікала стабільны і ўстойлівы гумаральны (антыцелавы - ВВС) імунны адказ як у выглядзе спецыфічных IgG да SARS-CoV-2, так і антыцелаў нейтралізацыі ў мышэй, сірыйскіх хамякоў і звычайных ігрунак (мартышак)», - высветлілі біёлагі з цэнтра ім. М.П. Чумакова. Яны падкрэслілі, што ўзровень антыцелаў нейтралізацыі «істотна не знізіўся цягам аднаго года».

Навукоўцы таксама правяралі «КовіВак» на цяжарных пацуках. Праблем з плодам, заўчасных або цяжкіх родаў і смяротных зыходаў у жывёл не выявілі.

У Расеі стварылася парадаксальная у параўнанні з еўрапейскім або амерыканскім рынкамі прэпаратаў сітуацыя. Людзей прышчапляюць «КовіВакам» з лютага, але публікацыя пра яго бяспеку і імунагеннасць (здольнасць выклікаць інфекцыі, адказ) і часткова - аб эфектыўнасці выйшла толькі ў жніўні - і ў ёй разглядаюцца толькі даследаванні на жывёлах. Аднак ніякіх звестак пра бяспеку і імунагеннасць на людзях няма, не кажучы ўжо пра эфектыўнасць.

Трэцяя фаза выпрабаванняў, падчас якой навукоўцы павінны высветліць эфектыўнасць гэтага прэпарата, пачалася ў чэрвені гэтага года.

Самай папулярнай, якая закрывае да 95% патрэбнасці ў вакцынах у Расеі, застаецца вакцына «Спадарожнік V». Гэтая вакцына зарэгістраваная ў 70 краінах, у некаторых з іх пачаліся закупкі і вытворчасць вакцыны. Аргенціна і Сан-Марына, дзе актыўна прышчапляюць «Спадарожнікам», апублікавалі свае справаздачы, у якіх ацанілі эфектыўнасць і пабочныя эфекты вакцыны. У Аргенціне таксама выйшла публікацыя асобна аб першым кампаненце «Спадарожніка», у якой навукоўцы зрабілі выснову пра тое, што яго эфектыўнасць праз 14-20 дзён пасля вакцынацыі супраць захворвання складала 87%, супраць шпіталізацыі - 94%, супраць смерці - 93%. Праз некаторы час эфектыўнасць падала, але ўсё адно заставалася досыць высокай. Аб «Спадарожніку» таксама ёсць дзве публікацыі ў аўтарытэтным часопісе Lancet (1, 2). Усе гэтыя даследаванні праводзіліся на людзях, справаздачы з краін таксама заснаваныя на ўжыванні ў людзей.