Камандуючы амерыканскімі войскамі ў Еўропе: ЗША ўважліва сочаць за расейска-беларускім цэнтрам вайсковай падрыхтоўкі

У Вільні Крыстафер Каволі абмеркаваў пытанні рэгіянальнай бяспекі з начальнікам генштаба ўзброеных сіл Літвы.

ЗША і Літва будуць працаваць разам над захаваннем міру на кантыненце, нягледзячы на тое, «хто, што і дзе размяшчае», - заявіў у чацвер камандзір амерыканскімі сіламі ў Еўропе і Афрыцы Крыстафер Каволі. Гэта заява была зроблена пасля таго, як Беларусь і Расея правялі сумесныя вайсковыя вучэнні і стварылі сумесны цэнтр вайсковай падрыхтоўкі, паведамляе «Голос Америки».

Размаўляючы з журналістамі, Каволі, які здзейсніў візіт у Вільню, падкрэсліў, што ЗША і іх хаўруснікі надаюць расейска-беларускаму вучэбна-баявому цэнтру сур'ёзную ўвагу.

Знаходзячыся ў літоўскай сталіцы, Каволі абмеркаваў пытанні рэгіянальнай бяспекі з начальнікам генштаба ўзброеных сіл Літвы Валдэмарасам Рупсісам.

Нагадаем, што вучэнні «Захад-2021», якія праходзілі, між іншым, на аб'ектах, блізкіх да межаў Еўразвязу, выклікалі занепакоенасць у суседніх краін, уключаючы Літву, Польшчу і Украіну.

Адказваючы на зададзенае яму пытанне пра сумесны вучэбна-баявы цэнтр, створаны Расеяй і Беларуссю, генерал Каволі адказаў, што ЗША і іх хаўруснікі «надаюць яму пільную ўвагу» ў рамках агульнага назірання за размяшчэннем сіл як у Еўропе, так і за яе межамі. «Мы сочым за тым, што адбываецца і... выкарыстоўваем гэта для ажыццяўлення стрымлівання і падтрымання міру ў Еўропе», - сказаў ён.

«Мы абмеркавалі сітуацыю з бяспекай у рэгіёне, прысутнасць сіл ЗША ў Літве, сумесныя вучэнні і сумесныя дзеянні ў выпадку крызісу ці вайны», - сказаў генерал Рупсіс журналістам, дадаўшы, што Каволі запэўніў яго ў тым, што «перад тварам пагроз» ЗША і Літва будуць дзейнічаць сумесна.