Медыкі назвалі галоўныя ўласцівасці новых штамаў COVID-19 і распавялі, як ад іх абараніцца

Даследаванне правялі ў ЗША.

Мутаваныя штамы COVID-19 могуць вельмі эфектыўна распаўсюджвацца ў паветры. Праз гэта яны лічацца больш заразнымі, чым «арыгінальны» варыянт каранавіруса, выяўлены ў 2019 годзе.

Такую галоўную іх небяспеку апісалі амерыканскія навукоўцы ў навуковым артыкуле, апублікаваным у часопісе Clinical Infectious Diseases. Са слоў спецыялістаў, маскі могуць толькі напалову знізіць колькасць атрыманых часціц віруса ў выпадку кантакту з хворым.

Даследнікі выявілі, што пацыенты, інфікаваныя штамам Альфа, выпусцілі ў паветра ў 43-100 разоў больш віруса, чым заражаныя зыходнай версіяй COVID-19.

Адзначаецца, што збольшага гэта было звязана з тым, што ў першай групы была падвышаная колькасць віруса ў мазках з носа і сліне. Да таго ж колькасць часціц віруса, што выдыхаюцца, была ў 18 разоў большая, чым можна было б растлумачыць больш высокай віруснай нагрузкай.

Спецыялісты падкрэслілі, што ў штама Дэльта лічбы адносна цыркулявання вірусных часціц будуць, імаверна, нават большыя. Акцэнт на Альфа-варыянце яны зрабілі таму, што даследаванне праходзіла як раз у момант найбольшай яго распаўсюджанасці.

«Мы ведаем, што варыянт Дэльта, які цыркулюе зараз, нават больш заразны, чым Альфа», - сказаў суаўтар навуковай працы Дон Мілтан з Школы грамадскага аховы здароўя Універсітэта Мэрыленда.

Пры гэтым навукоўцы высветлілі, што свабодныя ахоўныя маскі для твару, якія носяць пацыенты з COVID-19 лёгкай ступені, могуць знізіць колькасць вірусных часціц у паветры вакол прыкладна толькі на 50%.

Мілтан дадаў, што вынікі іх даследавання не сталі чымсьці новым. З ягоных слоў, яны толькі яшчэ раз пацвердзілі, што новыя штамы каранавіруса «паляпшаюць свае здольнасці» перасоўвацца па паветры. Таму людзі павінны забяспечыць лепшую вентыляцыю ў памяшканнях і насіць шчыльна прылеглыя маскі ў дадатак да вакцынацыі, каб дапамагчы спыніць распаўсюджванне віруса.