У Фінляндыі з'явіліся першыя ў свеце шафы для зарадкі электраровараў

З дапамогай такой шафы можна хутка зарадзіць свой транспартны сродак, не перажываючы за яго бяспеку.

На вуліцах фінскага горада Турку з'явіліся першыя ў свеце шафы для зарадкі электраровараў. З дапамогай такой шафы можна хутка зарадзіць свой транспартны сродак, не перажываючы за яго бяспеку, піша «Еўра пульс».

Акумулятары электраровараў - самая слабая частка транспартнага сродку. Нярэдка праз няправільнае абыходжанне падчас зарадкі яны запальваюцца або выпускаюць небяспечныя газы.

Каб не дапусціць такіх аварый, шафы таксама абсталявалі «разумнымі» дэтэктарамі дыму і газу. У выпадку выяўлення выцеку яны аўтаматычна адключаюць зарадны ток.

Акрамя таго, шафы абсталяваныя сістэмай тушэння пажараў, якая таксама актывуецца аўтаматычна.

Усяго ў Турку ўсталявалі тры зарадныя шафы. Зарадная шафа можа зараджаць адначасова 10 ровараў.

У 2020 годзе еўрапейцы купілі рэкордныя за дваццаць гадоў 4,5 мільёна электраровараў. Гэта больш за 20% ад усіх набытых ровараў у Еўропе.