У Беларусі назіраецца востры недахоп кіроўцаў

Гэта праблема ўсёй рэспублікі.

У Беларусі па-ранейшаму назіраецца дэфіцыт кіроўцаў. Цяпер у агульнарэспубліканскім банку вакансій значыцца больш за 5,1 тысячу прапаноў ад наймальнікаў для такіх работнікаў. Гаворка менавіта пра кіроўцаў аўтамабіляў. Пры гэтым у некаторых гарадах не стае кіроўцаў грамадскага транспарту, у іншых - смеццявозаў. Праз гэта здараюцца перабоі ў руху гарадскога пасажырскага транспарту, а таксама праблемы з вывазам смецця, паведамляе мясцовая прэса. Тым часам у суседніх краінах назіраецца попыт на кіроўцаў з нашай краіны. Сярод іх - Літва і Польшча. Zerkalo.io паглядзела, якая сітуацыя з вакансіямі для гэтых працаўнікоў.

У Светлагорску ў аўтапарку не стае мінімум 25 кіроўцаў. Праз гэта ў горадзе пачасціўся нявыхад на маршрут аўтобусаў гарадскіх ліній, паведамляе рэгіянальнае выданне «Ранак». «І гэта праблема не толькі наша, а ўсёй рэспублікі, - сказаў дырэктар філіяла «Аўтобусны парк № 5» ААТ «Гомельаблаўтатранс» Аляксандр Казакоў. - На нашу аўтапарку некамплект складае 25 чалавек, па вобласці паўтары сотні не стае... Цяпер кіроўцы аддаюць перавагу ісці на працу ў арганізацыі «Беларуснафты», дзе таксама недахоп людзей, а заробкі - вышэйшыя. У нас на гарадскіх маршрутах кіроўца можа за месяц атрымаць 1000-1200 рублёў, а ў нафтавікоў 1700 атрымліваецца».

З яго слоў, на працу гатовыя браць у тым ліку людзей без досведу работы. «Мы цяпер гатовыя прыняць на працу практычна любога кіроўцу, нават без досведу. Ёсць катэгорыя «D» - выдатна. Ёсць толькі «С» - не бяда, мы за свае сродкі гатовыя навучыць на «D» з наступным гарантаваным працаўладкаваннем. Іншагароднім з жыллём дапаможам - сёння гэта не праблема, усё можна развязаць», - удакладніў Аляксандр Казакоў.

У Дзяржынску - недахоп кіроўцаў смеццявозаў, праз гэта ўзнікаюць праблемы з вывазам жыллёва-камунальных адкідаў, піша мясцовая раённая газета «Узвышша». «Зараз складаная сітуацыя з кадрамі, машыны прастойваюць. Нам папросту не стае кіроўцаў смеццявозаў», - распавялі ў Дзяржынскім ЖКГ. У райвыканкаме пацвярджаюць кадравую праблему. «Па-першае, змяніць падыход да працэдуры пошуку супрацоўнікаў. Больш увагі надаваць інфармаванню людзей аб вакансіях у сельскіх населеных пунктах. Па-другое, кіроўцаў трэба пераводзіць на 11-гадзінны працоўны дзень. Ні адзін смеццявоз з бакавой загрузкай не павінен прастойваць», - удакладніў намеснік старшыні Дзяржынскага райвыканкама Дзяніс Пракопчык.

Раней у Дзяржынску праз «востры недахоп кіроўцаў» аўтапарк прыпыняў некаторыя аўтобусныя рэйсы. Пра дэфіцыт кадраў у аўтапарку Дзяржынска, які займаецца не толькі рэгулярнымі пасажырскімі перавозкамі, але і грузавымі, казалі яшчэ ў 2017 годзе.

Пра кадравую праблему з кіроўцамі таксама паведамлялі ў Рагачове.

Якія заробкі гатовыя плаціць кіроўцам

Зараз у агульнарэспубліканскім банку вакансій размешчана больш за 5150 прапаноў для кіроўцаў аўтамабіляў. Большасць вакансій - 3700 прапаноў - з заробкам да 800 рублёў. «Палучкі» больш за 1500 рублёў абяцаюць па 270 вакансіях. Да прыкладу, «Нафтан-Спецтранс» шукае кіроўцу пагрузчыка на заробак 1540 рублёў. З патрабаванняў - правы кіроўцы катэгорый А, В, С, F. Таксама трэба пасведчанне трактарыста-машыніста. «Мінаблаўтатранс» спрабуе знайсці ў аўтапарк ў Жодзіне 6 кіроўцаў грузавых аўтамабіляў. Заробак - ад 1500 рублёў.

Наймальнікам таксама патрабуецца больш за 2500 трактарыстаў.

Тым часам беларускія кіроўцы запатрабаваныя ў суседніх краінах. Да прыкладу, у Літве патрабуецца некалькі тысяч кіроўцаў. Літоўскія і польскія транспартныя кампаніі досыць актыўна наймаюць беларусаў.