CIT: Расея перакінула «Іскандэры» з Далёкага Усходу на заходнія межы

Спецыялісты знайшлі відэа транспартавання ракетных установак.

Група Conflict Intelligence Team (CIT), якая займаецца расследаваннямі, паведаміла аб перакідцы ракетных установак «Іскандэр» з Далёкага Усходу на захад Расеі.

Спецыялісты знайшлі ў сацсетках апублікаванае 11 студзеня відэа, на якім ракетны комплекс 9К720 «Іскандэр-М» перамяшчаюць на цягніку з Далёкага Усходу. У CIT адзначылі, што пускавыя ўстаноўкі 9П78-1 або транспартна-зараджальныя машыны 9Т250-1 на відэа накрытыя брызентам, але іх можна апазнаць па абрысах.

Такія ж «Іскандэры» таксама выявілі на роліку са Свярдлоўскай вобласці, апублікаваным 13 студзеня. Акрамя іх на відэа можна заўважыць іншыя машыны комплексу «Іскандэр-М»: 9Т248, 9С552, 9С920-1 ці 9У91. На гэтым жа роліку, як адзначаюць у CIT, бачныя аўтацягнікі з седлавымі цягачамі КАМАЗ-44108, якія могуць выкарыстоўвацца для перавозкі ракет, што выкарыстоўвае комплекс.

Таксама аўтацягнікі, як мяркуецца, з ракетамі спецыялісты заўважылі на яшчэ адным апублікаваным 11 студзеня відэа.

CIT са спасылкай на інфармацыю з адкрытых баз звестак паведамляе, што цягнікі маглі выехаць са станцый Дывізійная ва Улан-Удэ і са станцыі Бірабіджан-2, якія знаходзяцца побач са 103-й і 107-й ракетнымі брыгадамі, на ўзбраенні якіх ёсць «Іскандэры».

У групе расследавання адзначаюць, што вясной мінулага года да мяжы з Украінай ужо перакідваліся «Іскандэры», як мяркуецца, 119-й ракетнай брыгады са складу 41-й агульнавайсковага войска.

«Тут важнае тое, што такая брыгада - сродак вайсковага ўзроўню, што азначае, што з Усходняй вайсковай акругі перакідваюцца, хутчэй за ўсё, не асобныя батальённа-тактычныя групы, а значныя сілы дыслакаваных там войскаў», - адзначаюць у CIT.

12 студзеня аналітыкі з Conflict Intelligence Team (CIT) паведамілі аб перакідванні расейскіх вайскоўцаў і тэхнікі з Сібіры і Далёкага Усходу ў заходнія рэгіёны Расеі. Згодна са знойдзенымі спецыялістамі відэа, у заходнія рэгіёны Расеі перавозяць вайсковыя грузавікі, аўтазапраўшчыкі, танкі, баявыя машыны пяхоты, рэактыўныя сістэмы залпавага агню «Град» і «Ураган».

14 студзеня ў Мінабароны заявілі аб пачатку праверкі баявой гатоўнасці войскаў ва Усходняй вайсковай акрузе, у рамках якой частка злучэнняў і воінскіх часцей «зробяць маршы камбінаваным спосабам на незнаёмыя палігоны, размешчаныя на значным аддаленні ад пунктаў сталай дыслакацыі, для выканання вучэбна-баявых задач».

З сярэдзіны кастрычніка мінулага года заходнія СМІ і вайсковыя аналітыкі паведамляюць аб магчымым уварванні Расеі ва Украіну ў пачатку 2022 года і аб вялікай колькасці расейскіх войскаў ля заходняй мяжы. 14 студзеня ў Белым доме і Пентагоне паведамілі, што ва ўладаў ЗША ёсць інфармацыя аб падрыхтоўцы Расеяй правакацыі «з чужым сцягам» для апраўдання ўварвання ва Украіну.