Кіраўніца МЗС Нямеччыны адправілася з візітамі ў Кіеў і Маскву

Анналена Бэрбок выключыла магчымасць саступак РФ у прынцыповых пытаннях.

Міністарка замежных спраў ФРГ Анналена Бэрбок (Annalena Baerbock), перад візітамі ў Кіеў і Маскву, падкрэсліла гатоўнасць Захаду да перамоў з Расеяй аб зніжэнні напружанасці ў канфлікце вакол Украіны, піша dw.com.

"Мы гатовы да сур'ёзнага дыялогу аб двухбаковых дамоўленасцях і кроках, якія прынясуць больш бяспекі ўсім у Еўропе, у тым ліку Расеі", - заявіла яна перад адлётам у Кіеў у панядзелак, 17 студзеня, у Бэрліне.

У той жа час Бэрбок падкрэсліла, што Захад "не можа і не будзе ісці на саступкі ў асноўных прынцыпах, напрыклад, тэрытарыяльнай цэласнасці, свабодзе выбару звязаў і блокаў і адмове ад насілля як інструмента палітыкі". "Мы поўныя рашучасці рэагаваць у тым выпадку, калі Расея замест гэтага выбера шлях эскалацыі", – папярэдзіла яна.

Паводле слоў Бэрбок, "перадумова дыпламатыі - разумець пункт гледжання іншай стараны, нават калі той прытрымліваецца абсалютна супрацьлеглага меркавання". Міністарка сказала, што будзе ўважліва слухаць сваіх суразмоўцаў у Кіеве і Маскве, але пры гэтым "з усёй яснасцю" даводзіць да іх пазіцыю Захаду. Кіраўніца МЗС ФРГ выказала намер растлумачыць гатоўнасць старон да дыпламатычнага ўрэгулявання канфлікту і спрыяць ажыўленню "нармандскага фармату", у рамках якога ўкраінскі крызіс абмяркоўваюць Украіна, Расея, ФРГ і Францыя.

Канфлікт вакол Украіны

У сталіцы Украіны Кіеве Бэрбок правядзе перамовы з прэзідэнтам Украіны Уладзімірам Зяленскім і кіраўніком МЗС гэтай краіны Дзмітрыем Кулябам. Яна таксама сустрэнецца з прадстаўнікамі Арганізацыі бяспецы і супрацоўніцтве ў Еўропе (АБСЕ). Увечары 17 верасня яна вылеціць з Кіева ў Маскву для перамоў з расейскім калегам Сяргеем Лаўровым.

Расея сцягнула да мяжы з Украінай блізу 100 тысяч вайскоўцаў. Захад асцерагаецца ўварвання расейскіх войскаў ва Украіну, аднак Масква адмаўляе наяўнасць у яе такіх планаў. Крэмль падкрэслівае, што для яго важныя "гарантыі бяспекі" і ў сувязі з гэтым намагае на адмове NАТО ад далейшага пашырэння на ўсход і прыёму ў свой склад Украіны.

NАТО катэгарычна зняпраўджвае гэтае патрабаванне і, са свайго боку, патрабуе адводу расейскіх войскаў ад мяжы з Украінай. Анналена Бэрбок адзначыла, што на перамовах у Маскве для яе важна акрэсліць пазіцыі. "Як новы федэральны ўрад мы зацікаўлены ў сур'ёзных і стабільных стасунках з Расеяй", – сказала яна.