У Менску па пяць дзён стаяць на дварэ ў чарзе па танныя кватэры

У чэргах нават начуюць.

У сталіцу зноў вярнуліся чэргі па кватэры.

Гэтым разам у цэнтры ўвагі каркасны дом на Жукоўскага, які будуе «Мінскі домабудаўнічы камбінат». На мінулым тыдні забудоўшчык прапанаваў усім ахвотным (у тым ліку і тым, хто мае патрэбу, незалежна ад даты пастаноўкі на ўлік) паўдзельнічаць у будаўніцтве 200 кватэр. Агучаны кошт "квадрата" (1 983 рубля - для чаргавікоў без накіравання) чакана прывёў да ажыятажу. Яшчэ на мінулым тыдні пад дзвярамі "МДК" утварылася чарга. Патэнцыйныя дольнікі вялі спісы і начное дзяжурства. Сёння раніцай у ведамстве пачалі прыём заяў. Realt.by паглядзеў, як ён праходзіць.

Раніца каля будынка на адрасе Панамарэнка, 43 праходзіць нервова. У чаканні пачатку працы будаўнічай арганізацыі каля ўвахода сабраліся блізу сотні чалавек. Некаторыя з іх правялі тут ноч. Балазе, у апошнія дні крыху пацяплела.

Кажуць, што ў аўторак (дзень выхаду дэкларацыі) у чарзе ўжо было амаль 50 чалавек, у сераду спіс дасягнуў 220 чалавек, у чацвер перасягнуў за 260, а за выходныя пераадолеў планку 350 чалавек. Гэта пры тым, што чаргавікам без накіравання і ўсім ахвочым прапаноўвалася толькі 200 кватэр.

Для таго, каб упарадкаваць працэс, быў арганізаваны чат у тэлеграм, пераклічкі і 24-гадзіннае дзяжурства. Людзі ў чарзе сцвярджаюць, што ўсё праходзіла спакойна, без эксцэсаў.

Наогул, чарга каля МДК - прыклад вельмі добрай арганізацыі. Здаецца, што выпадковы чалавек тут сапраўды не праскочыць. Пры нас у чаргу спрабуе прайсці новенькі. Яму адразу ж падказваюць, як і куды можна запісацца і папярэджваюць, што перад ім больш за 350 чалавек. Спадар у кідкай камізэльцы просіць застацца ля ўваходу першых дваццаць чалавек.

− Папрашу, давайце адыдзем. Усе бачаць, што ўсё шчыра, адкрыта, ніхто чужы не пройдзе. Ахова МДК будзе нам дапамагаць. У буфернай зоне застаюцца 20 чалавек.

Журналісты падышлі да дзвюх спадарынь. Адная з іх у пледзе.

− Вы што начавалі тут?

− Так, кожны павінен быў аддзяжурыць 1 ці 2 разы. Мы гуртам былі тут гэтай ноччу. Я ў асноўным сядзела ў аўто, хлопцы стаялі каля дзвярэй.

− Чаму такі попыт менавіта на гэты дом?

− Дык, нічога лепшага ў кошце ў Менску на сённяшні дзень няма! А тут і дом - не панэлька, і метро побач, і від на «Мінск Мір».

Сапраўды, прычына ўзніклага ажыятажу - у прыемным кошце і тым, што ад чаргавікоў не патрабуюць накіравання ад адміністрацыі. Гэта значыць, прэтэндаваць на квадратныя метры па 1983 рублі можа той, хто стаў на ўлік у патрэбе хоць месяц таму. Менавіта таму, нягледзячы на тое, што ў дэкларацыі згаданыя і ўсе ахвочыя (для іх кошт метра пачынаецца ад 2950 рублёў), у рэальнасці пад дзвярыма арганізацыі стаяць тыя самыя чаргавікі без накіраванняў.

Для іх, улічваючы льготны кошт «квадрата», кошты на кватэры ў доме на Жукоўскага выглядаюць вельмі прывабна. Да прыкладу, аднапакаёўку (у залежнасці ад складу сям'і) можна набыць за $23-34 тысячы, двухпакаёўку - за $40-44 тысячы. Так, дадаткова ўсім дольшчыкам давядзецца заплаціць за абавязковае месца ў паркінгу (яно каштуе блізу $8 тысяч), але гэты нюанс патэнцыйных пакупнікоў, здаецца, не палохае.

Яны кажуць, што маніторылі сітуацыю з домам на Жукоўскага яшчэ з часу выхаду першай дэкларацыі. Ужо тады ў тэлеграме ўтварыўся чат, у якім было блізу 70 чалавек (сёння ў ім ужо больш за 500 чалавек).

Звяртаем увагу на незвычайныя нумаркі.

− Так, тут арганізатары пастараліся. Каб не падрабілі нумары, у кожнай дзясяткі свой "татэм". У кагосьці бегемоцікі, у кагосьці папугайчыкі, у кагосьці рыбкі. Наогул, арганізацыя на ўзроўні. Мы нават не хвалюемся. Будуць прапускаць строга па аднаму. Нават мужу з жонкай нельга. Каб не было ніякіх перакупаў.

Дарэчы, смешны момант: расказваюць, што адным з першых запісвацца ў спіс прыбег хлопец, які днём раней ужо падаў заяву на кватэру ў ЖК «Малая Радзіма» (на мінулым тыдні ля УКБ Завадскога раёна таксама стаяла чарга). Кошт жылля на Жукоўскага нават з месцам у паркінгу здаўся яму больш прывабным.

Нагадаем, што шматкватэрны жылы дом на вуліцы Жукоўскага пачалі будаваць у 2020 годзе. У доме на 5 пад'ездаў і 376 кватэр запраектаваны аднапакаёўкі, двухпакаёўкі, тройкі і чатырохпакаёўкі. Частка жылля прызначаная для шматдзетных сем'яў - яны атрымалі накіраванне на будаўніцтва ў адміністрацыях сваіх раёнаў і стыхійная чарга іх не тычыцца.

Плошчы жылля ў доме – стандартныя: аднапакаёвыя кватэры – ад 30 да 44 «квадратаў», двухпакаёвыя – ад 52 да 57 «квадратаў», трохпакаёвыя – ад 66 да 118 «квадратаў», чатырохпакаёвыя – ад 98 да 99 «квадратаў». На першых паверхах 2, 3 і 4-га пад'ездаў будуць размешчаны адміністрацыйныя памяшканні.

P.S. За першую гадзіну заявы падалі 10 чалавек.