Аналітык аб сыходзе Назарбаева: Лукашэнку гэта балюча назіраць

Ён ужо год просіць «не здраджваць яму».

На думку Сяргея Чалага, хуткасць «дэебалсізацыі Казахстана», імклівае развянчанне папярэдняга лідара сур'ёзна турбуе беларускага дыктатара. Такое меркаванне ён выказаў у новым выпуску «Чалы live»:

- Думаю, для яго балюча назіраць, з якой дзіўнай хуткасцю ліняе пазалота культу асобы Назарбаева, - адзначае аналітык. — Дарэчы, найбольш карыкатурныя рысы, з устаноўкай статуй, размяшчэннем цытат, перайменаваннем сталіцы — гэты культ асобы пачаў набываць пасля 2019 года, калі Назарбаеў анансаваў свой сыход.

І паколькі ўсё гэта было прыцягнутым за вушы, то і зліняла, умоўна кажучы, за тры дні, і ўжо ніхто не ўспамінае «бацькі нацыі», і, хутчэй за ўсё, гораду Нур-Султана дадуць папярэднюю назву.

Канешне, Лукашэнку гэта вельмі балюча назіраць. Бо ўжо год ён просіць «не здраджваць» не толькі яму, а не здраджваць «спадчыне» - маўляў, паглядзіце, я ж напрыдумваў вам столькі перамогі, уключаючы фэйкавы Дзень народнага адзінства, уяўную «Лінію Сталіна», якая не мела ніякага вайскова-стратэгічнага значэння…

Але насамрэч гаворка ідзе не пра памяць герояў вайны, а пра памяць пра чалавека, які паразітуе на героях вайны.

І я ўпэўнены, што ён сам разумее, як у момант усё гэта развеецца - няма пад ім ніякай апоры, здадуць у першую ж хвіліну. Рэвізіянізм будзе зместам наступнай палітычнай эпохі пры найменшых прыкметах адыходу.

Таму цяпер не нам, але яму, гэтаму калектыўнаму Лукашэнку, расказваюць, як мы ўсе будзем яму верныя, і калі ён наважыцца на нейкі з варыянтаў транзіту, мой прагноз — мы ўбачым кальку з казахстанскіх падзей, тое ж самае славаслоўе і апяванне.

Слабое звяно ў ланцугі эканомікі

- Будучы эканамічны крызіс непазбежны, - падкрэслівае Сяргей Чалы. - Калі да ўлады прыходзяць людзі, задача якіх - толькі кантраляваць плыні, «сядзець» на іх, але не ствараць кошт, крызіс закладзены ў самой такой мадэлі.

Таму асноўным пытаннем беларускай эканомікі, на думку аналітыка, з'яўляецца не тое, ці будзе крызіс, а тое, якой ён будзе інтэнсіўнасці і па якім канале пройдзе:

- Цяпер ідзе барацьба выключна паміж тым, хто будзе галоўным громаадводам - ці сыдзе маланка ў банкаўскую сістэму, альбо гэта будзе крызіс рэальнага сектара эканомікі. Хоць гэта рэчы даволі ўзаемазвязаныя, і калі крызіс будзе даволі інтэнсіўным, яго не ўдасца купіраваць у нейкім адным сектары, то ён стане сістэмным, захопіць эканоміку цалкам, асабліва калі размова ідзе аб праблемах рэальнага сектара.

А ў Беларусі эканамічная палітыка такая, што разрозненыя структуры займаюцца разрозненымі рэчамі, думаючы пра тое, як зрабіць так, каб прайшло не па іх тэрыторыі. Адсюль узнікаюць разнастайныя «крэатыўныя» ідэі, у тым ліку Агенцтва кіравання актывамі, Агенцтва страхавання ўкладаў, мацярынскі капітал і таму падобнае.

Тое, што чакаецца на найбліжэйшы год - ніякага росту мы не будзем назіраць, нядаўна сусветны банк прагназаваў, што хутчэй будзе эканамічны спад, і важна, як яго адчуе насельніцтва.

Эканамічны боль ад спаду 3% цягам двух гадоў (крызіс 2015-2016 года) выявіўся настолькі моцным, што стварыў некалькі незваротных працэсаў гніення, лакальных «пастак беднасці» ў беларускай эканоміцы на рэгіянальным узроўні.

Паўтарэнне чагосьці такога будзе азначаць, што гэтая цвіль распаўсюдзіцца на ўсю астатнюю тэрыторыю.