У МНС расказалі аб наступствах моцнага ветру ў Беларусі

Парывы ветру ў панядзелак дасягалі 27 метраў за секунду.

Парывы ветру ў панядзелак, 17 студзеня, дасягалі 27 метраў за секунду. У МНС расказалі аб наступствах - калі коратка, усё не так дрэнна, як у мінулую пятніцу.

Зафіксаваны 38 выпадкаў падзення дрэў у Берасцейскай (3), Гомельскай (1), Гарадзенскай (16), Менскай (10), Магілёўскай (5) абласцях і ў Менску (3), у выніку якіх пашкоджаны тры аўтамабілі. На шчасце, пацярпелых няма.

Цягам дня на тэрыторыі Беларусі перыядычна парушалася электразабеспячэнне 941 населенага пункта (Берасцейская вобласць - 19, Віцебская - 167, Гомельская - 93, Гарадзенская - 217, Менская - 387, Магілёўская - 58). Адключэнні аператыўна выпраўляюцца аварыйнымі брыгадамі. На 06.00 без электразабеспячэння застаюцца 65 населеных пунктаў (Віцебская - 9, Гомельская - 22, Гарадзенская - 15, Менская - 3, Магілёўская - 16).

У МНС таксама ўдакладнілі гэтыя непагадзі ў пятніцу, 14 студзеня. З-за моцнага ветру з парывамі да 32 м/с пацярпелі 982 населеныя пункты (раней паведамлялася пра 836).