Украінскія вайскоўцы будуюць верталётныя пляцоўкі на мяжы з Беларуссю
27- 18.01.2022, 17:46
- 13,430
Таксама яны ўсталёўваюць рознага кшталту загароды.
Праз справакаваны міграцыйны крызіс на мяжы Беларусі і краін ЕЗ Украіна істотна актывізавала добраўпарадкаванне паўночнага адцінку мяжы.
Пра гэта гаворыцца ў паведамленні ГПСУ, паведамляе Укрінфарм.
«Яшчэ з пачатку лістапада на ўкраінска-беларускай мяжы ўвесь час працуюць блізу трох дзясяткаў інжынерных груп памежнікаў. Яны ўсталёўваюць рознага кшталту загароды - з калючага дроту, сеткі-рабіцы, робяць пераносныя загароды. Таксама інжынерныя групы працуюць над уладкаваннем верталётных пляцовак, каб забяспечыць аператыўнае перакідванне рэзерваў у выпадку імклівай змены абстаноўкі на пэўным адцінку», гаворыцца ў паведамленні.
З пачатку справакаванага міграцыйнага крызісу ў суседняй краіне для ўладкавання мяжы Украіны ўжо прыцягнутыя амаль 4630 бухт спіральна-лінейных загарод. Значную іх частку далі органы мясцовай улады Валынскай вобласці.
Пры гэтым 2460 бухт памежнікі вырабілі на ўласных магутнасцях. Для гэтага ў Галоўным цэнтры падрыхтоўкі асабовага складу Дзяржпагранслужбы ў Чаркаскай вобласці разгорнутая ўласная вытворчасць, якая дае магчымасць вырабляць драцяныя загароды, сетку-рабіцу.
Ужо сёння памежнікі здольныя самастойна вырабляць штодзённа загароды, якія дадуць магчымасць уладкаваць адцінак мяжы працягласцю да трох кіламетраў.
Як паведамлялася, згодна з распараджэннем урада «Аб выдзяленні сродкаў для ажыццяўленне мерапрыемстваў, звязаных з умацаваннем абараназдольнасці дзяржавы «Дзяржпагранслужбе Украіны выдзелена 21 000 000 грн, на якія закуплена амаль 300 т сыравіны, што дазволіць вырабіць загароды для інжынернага перакрыцця амаль 62 км украінска-беларускага адрэзку мяжы.