64-гадовая пенсіянерка Алена Гнаўк ужо тыдзень трымае галадоўку
6- 18.01.2022, 18:19
- 20,844
З берасцейскай актывісткі здзекуюцца ў пружанскім ІЧУ.
На мінулым тыдні пенсіянерка Алена Гнаўк атрымала 15 дзён арышту за парушэнне рэжыму адбыцця хатняй «хіміі», 11 студзеня яе змясцілі ў ІЧУ Пружан.
Гэтым «парушэннем» сталі мяшкі на плоце «па схеме БЧБ», якія міліцыянты палічылі пікетаваннем. За гэта жанчына таксама атрымала штраф у 50 базавых велічыняў.
Як паведамілі «Белсату» сваякі Алены Гнаўк, на сутках з жанчыны здзекуюцца.
«На загад кіраўніка пружанскага РАУС ёй забаронена перадаваць перадачы, пісаць і чытаць. Мы лічым, такім чынам яны спрабуюць яе ламаць», - кажуць сваякі Алены Пятроўны.
Тэрмін утрымання Гнаўк пад вартай скончыцца 25 студзеня. Нагадаем, што па двух артыкулах Крымінальнага кодэкса пенсіянерка асуджаная на тры гады «хатняй хіміі».