Пастаянная прадстаўніца ЗША пракаментавала вучэнні Беларусі і РФ
- 18.01.2022, 20:36
- 12,822
Вучэнні Расеі і Беларусі падкрэсліваюць агрэсіўны настрой супраць Украіны.
Сумесныя вайсковыя вучэнні Расеі і Беларусі з'яўляюцца яшчэ адным сігналам агрэсіўнага настрою Масквы супраць Украіны. У выпадку ўварвання на ўкраінскую тэрыторыю РФ атакуе статут ААН і панясе адказнасць.
Пра гэта паведамляе РБК-Украина са спасылкай на пастаянную прадстаўніцу ЗША пры ААН Лінду Томас-Грынфілд.
З яе слоў, ЗША ўстрывожаныя вайсковымі вучэннямі Расеі і Беларусі. Паведамленні аб сумесных манеўрах на беларускай тэрыторыі - гэта сігнал аб тым, што РФ агрэсіўна настроеная супраць Украіны.
«Калі Расея ўварвецца ва Украіну, то гэта будзе атакай на статут ААН», – сказала ў інтэрв'ю The Washington Post Томас-Грынфілд.
Яна ўдакладніла, што ЗША і хаўруснікі будуць дзейнічаць, у тым ліку, у Радзе бяспекі ААН, і Расея павінна быць гатова да гэтага. «Мы правялі ўжо ў Нью-Ёрку абмеркаванні з шэрагам калег», - дадала дыпламатка.
Нагадаем, раней лідар правячага ў Беларусі рэжыму Аляксандр Лукашэнка заявіў аб неабходнасці правесці сумесныя вучэнні з Расеяй.