20 красавiка 2024, Субота, 19:05
Падтрымайце
сайт
Сім сім,
Хартыя 97!
Рубрыкі

Рэжым страціў на гандлі з Расеяй і Кітаем $9,2 мільярда

Рэжым страціў на гандлі з Расеяй і Кітаем $9,2 мільярда

Найбольшае негатыўнае сальда замежнага гандлю ўтварылася з РФ.

Статыстычныя органы падвялі вынікі замежнага гандлю таварамі за 11 месяцаў. Негатыўнае сальда таварных плыняў з РФ і КНР дасягнула вялізных значэнняў, піша banki24.by.

Замежны гандаль Беларусі з іншымі краінамі складаецца з экспарту і імпарту. Даведка: экспарт - гэта вываз тавараў за межы беларускай тэрыторыі, а імпарт - увоз тавараў у РБ. Калі імпарт большы за экспарт, утвараецца негатыўнае (адмоўнае) сальда замежнага гандлю.

Расея і Кітай уваходзяць у топ асноўных гандлёвых партнёраў Беларусі. Па выніках 11 месяцаў 2021-га РФ заняла першае месца паводле абароту тавараў з РБ, КНР - трэцяе месца.

У 2021 годзе найбольшае негатыўнае сальда таварнага гандлю ўтварылася з Расеяй - 6,435 млрд USD за 11 месяцаў. У параўнанні з аналагічным перыядам 2020 года памер сальда для Беларусі пагоршыўся на 3,7 млрд. USD. Падзенне балансу гандлю з РФ адбылося за кошт апераджальнага росту імпарту тавараў з Расеі.

Са звестак Белстата за 11 месяцаў расейскі імпарт падскочыў на 45,8%, а беларускі экспарт вырас на 24,7%. У 2021-м на кожныя 100 USD імпарту з Расеі беларусы адпавядалі экспартнымі пастаўкамі ў РФ толькі на 69,7 USD. У 2020 годзе прапорцыя імпарту і экспарту былі вышэйшыя для Беларусі – 100 USD на 81,5 USD.

Такім чынам, за 2021 год павялічыўся дысбаланс у таварным гандлі з Расеяй у параўнанні з 2020 годам. Гэта наўрад ці добры знак, бо РФ адначасова выступае крэдыторам РБ - наўпрост і праз Еўразійскі фонд стабілізацыі і развіцця.

Удзельная вага Расеі ў таварным гандлі Беларусі вельмі вялікая. За 11 месяцаў 2021-га яна склала 49,1%, што больш за сукупную дзель ўсіх астатніх краін са спісу топ-100 партнёраў РБ (48,1%).

Залежнасць у таварным гандлі ад РФ вырасла што да 2020 года. У 2020-м дзель Расеі была роўная 47,9% - на 1,2 п.п. менш, чым у 2021-м. У 2021-м удзельная вага паставак у/з РФ у экспарце склала 41%, а ў імпарце - 57%.

Трэба адзначыць, што экспарт нафтапрадуктаў у ЕЗ і Украіну фактычна выступае першай вытворнай ад імпарту расейскай нафты. Калі не будзе вялікіх паставак сыравіны з РФ, згасне і вуглевадародны экспарт на поўдзень і захад.

Дысбалансы ў таварным гандлі Беларусі з Кітаем яшчэ глыбейшыя. За 11 месяцаў 2021-га адмоўнае сальда гандлю з КНР дасягнула 2,784 млрд USD. У 2021 годзе ў разліку на 100 USD імпарту ў Кітай паступала ўсяго 21,6 USD беларускага экспарту.

Удзельная вага Кітая ў таварных пастаўках скарацілася. Калі ў 2020-м дзель кітайцаў у замежным гандлі РБ дасягала 7,3%, то ў 2021-м упала да 5,9%. За 11 месяцаў 2021-га экспартныя пастаўкі ад беларусаў у Кітай занялі 2,1 адсотка ад сукупных паставак на замежны контур, а імпарт з КНР забяспечыў 9,5 адсотка ўвозу тавараў з іншых краін.

Агульнае негатыўнае сальда гандлю з Расеяй і Кітаем за 11 месяцаў вырасла да 9,219 млрд. USD. У 2020 годзе яно дасягала 5,354 млрд USD.

Для снежня месяца ў Беларусі характэрны буйныя аб'ёмы імпарту тавараў з іншых краін. Часта яны становяцца найбольшымі ў годзе.

На зыходзе года сітуацыю маглі пагоршыць заяўленае з 1 студзеня харчовае "эмбарга" Беларусі і снежаньскі раўнд заходніх санкцый. Як паказвае практыка мінулых гадоў, бізнэсы ў такіх сітуацыях схільныя ўвозіць тавары ў РБ "у запас". Таму адмоўнае сальда гандлю з РФ і КНР па выніках поўнага года хутчэй за ўсё толькі вырасце.

Афіцыйныя падлікі за 12 месяцаў стануць вядомыя ўжо ў лютым.

Напісаць каментар

Таксама сачыце за акаўнтамі Charter97.org у сацыяльных сетках