Гелікоптар Мі-24, які ўпаў пад Салігорскам, ляцеў з месца, дзе знаходзіўся Лукашэнка

Пасля экстраннага прызямлення кагосьці выносілі на насілках.

Учора прэс-служба Мінабароны паведаміла, што падчас выканання планавых палётаў экіпажам гелікоптара Мі-24 былі выяўленыя непаладкі ў працы сілавога агрэгата борта.

«Экіпаж прыняў пастанову здзейсніць змушаную пасадку на непадрыхтаваную пляцоўку. Экіпаж не пацярпеў. Праводзіцца расследаванне», – заявілі ў Мінабароны.

Здарэнне адбылося ў Салігорскім раёне, ля аграгарадка Гоцк, паведамляе партал esoligorsk.by. Мясцовыя жыхары апісваюць «вымушаную пасадку» Мі-24 як падзенне. «Сёння ўвечары быў чуваць роў матора, гелікоптар усё кружыў, кружыў над Гоцкам, а потым упаў», – кажа адзін з суразмоўцаў выдання.

Паводле інфармацыі незалежных тэлеграм-каналаў, гелікоптар вяртаўся з Лунінца, дзе ўчора быў Аляксандр Лукашэнка, і здзейсніў экстранную пасадку ў лесапаласе. «Хоць Мінабароны сцвярджае, што ніхто не пацярпеў, паводле нашай інфармацыі выкарыстоўваліся насілкі. А таксама з Мачулішчаў вылятаў эвакуацыйны гелікоптар», – паведамляюць тэлеграм-каналы.