75-гадовы француз паспрабаваў пераплысці на вёслах Атлантычны акіян

Гэтае адзіночнае амбіцыйнае плаванне павінна было стаць для яго другім.

У пятніцу перакуленую лодку французскага шукальніка прыгод Жана-Жака Савена знайшлі паблізу Азорскіх астравоў, прыкладна за паўтары тысячы кіламетраў ад Партугаліі, адкуль ён стартаваў. Прычыны і абставіны смерці Савена пакуль невядомыя. Гэтае адзіночнае амбіцыйнае плаванне павінна было стаць для яго другім, піша Бі-бі-сі.

Савен адправіўся ў другое падарожжа праз Атлантычны акіян 1 студзеня з партугальскага Сагрэшу. Першае ён здзейсніў больш за тры гады таму ў вялікай, спецыяльна пабудаванай бочцы. Але ў пятніцу яго лодку знайшлі ў моры перакуленай.

«На жаль, гэтым разам акіян апынуўся мацнейшым, чым наш сябар, які так кахаў мора і вандраванні па ім»,

- гаворыцца ў заяве на старонцы Савена ў Фэйсбуку.

У сераду Савен напісаў у «Фэйсбуку», што моцныя вятры працягнулі яго падарожжа на 900 кіламетраў і што ў яго праблемы з сонечнай панэллю, але запэўніў чытачоў, што нічога страшнага ў гэтым няма і ён ліквідуе непаладкі, як толькі дабярэцца да сталіцы Азорскіх выспаў, Понта-Дэлгада. А ў ноч на чацвер Савен выпусціў два аварыйныя буйкі, якія падавалі сігналы бедства. З таго часу сувязі з ім не было.

Былы дэсантнік, а затым прыватны пілот Савен на мінулым тыдні адзначыў сваё 75-годдзе, выпіўшы на сваёй лодцы шампанскага і закусіўшы яго фуа-гра. Ён планаваў перасекчы акіян у сваёй васьміметровай вяслярнай лодцы прыкладна за тры месяцы. Усю гэту выправу ён лічыў «спосабам пасмяяцца над старасцю».