Украінскія вайскоўцы могуць знішчыць калону расейскіх танкаў за 36 секунд

А ЗША дапамогуць Украіне біць Пуціна, як дапамаглі хаўруснікам біць Гітлера.

Украінскае канструктарскае бюро «Луч» прадэманстравала ракетны комплекс РК-10, брытанцы даставілі ва Украіну супрацьтанкавыя ракеты, а Мінабароны Украіны пачало разгортваць сілы тэрытарыяльнай абароны.

Партал dsnews.ua сабраў пазітыўныя для Украіны навіны тыдня.

Галоўнакамандуючы УСУ распавёў, як украінскія абаронцы будуць знішчаць расейскія танкі

«На вачах журналістаў група людзей, якія пад'ехалі да месца вучэнняў на звычайным грузавіку, за 36 секунд знішчыла калону танкаў. Сем танкаў за 36 секунд. Прысутныя нават не адразу зразумелі, што і як адбылося», — так аб выніку вучэнняў УСУ ў інтэрв'ю «Укрінфарму» распавёў галоўнакамандуючы Узброенымі сіламі генерал-лейтэнант Валерый Залужны.

З ягоных слоў, «вораг таксама павінен добра зразумець: у нас дастаткова супрацьтанкавых сродкаў, у тым ліку айчыннай вытворчасці, якія паказваюць сябе вельмі добра. Да гэтага мы атрымалі дастатковую матэрыяльна-тэхнічную дапамогу ў выглядзе тых жа Javelin. Скажу так — усім дастаткова».

«Для расейскіх танкаў на сёння не існуе ніякай абароны або перашкод, якія не мог бы пераадолець Javelin, — асабліва зазначыў Залужны».

Брытанія падтрымала Украіну тысячамі супрацьтанкавых ракет

Урад Вялікай Брытаніі паставіў Украіне некалькі тысяч супрацьтанкавых кіраваных ракет на выпадак наўпроставага ўварвання расейскага войска. Пра гэта паведаміў намеснік міністра абароны Злучанага Каралеўства Джэймс Хіпі.

Ён зазначыў, што Украіна сутыкаецца з «экзістэнцыйнай пагрозай» з боку Расеі. Хіпі таксама перакананы, што ўварванне ва Украіну было б «надзвычай дурной» пастановай Крамля. «Масква павінна разумець: гэта (уварванне) не будзе бяскроўным, гэта не будзе лёгкай прагулкай у парку (для Расеі — «ДС»)», — сказаў Хіпі.

У сваю чаргу кіраўнік Мінабароны Вялікай Брытаніі Бэн Уолес заявіў, што Злучанае Каралеўства гатовае перадаць Украіне яшчэ больш зброі. З ягоных слоў, ужо было адпраўлена 2 тысячы супрацьтанкавых гранатамётаў.

«Я прадоўжу старанна сачыць за неабходнасцю пашырэння аб'ёму пастаўкі абароннай зброі ва Украіну. Я не выключаю нічога, што магло б дапамагчы самаабароне Украіны», — сказаў Уолес. Ён таксама дадаў, што далейшыя пастаўкі Брытаніі могуць заахвоціць іншыя заходнія краіны павялічыць сваю дапамогу Украіне.

«Аб'яднанае каралеўства рашуча настроена стаяць побач з Украінай, падтрымліваць яе суверэнітэт і агульныя інтарэсы. Мы ўжо восем гадоў дапамагаем ім будаваць абаронныя магчымасці і наважылі павялічыць гэтую дапамогу на фоне расейскай агрэсіі», — зазначыў міністр.

Акрамя кіраваных ракет, з Брытаніі ва Украіну прыбыла партыя супрацьтанкавых комплексаў NLAW. Гэты ручны сродак з эфектыўнай далёкасцю стральбы да 600 (у новай версіі да 800) метраў. Перад пускам наводчык з дапамогай прыцэла цягам трох секунд адсочвае кутнюю хуткасць цэлі, якая запамінаецца інэрцыйным блокам ракеты, ён пры палёце робіць неабходныя папраўкі, карэктуючы кірунак руху.

КБ «Луч» прадэманстравала ракетны комплекс РК-10

Камандуючы Наземнымі войскамі УСУ генерал-палкоўнік Аляксандр Сырскі наведаў Канструктарскае бюро «Луч», дзе яму прэзентавалі найноўшую распрацоўку - ракетны комплекс РК-10, здольны збіваць беспілотнікі і верталёты.

Як паведамляе Ukrainian Military Pages, універсальная кіраваная ракета ў транспартна-пускавым кантэйнеры РК-10 са зменнымі баявымі часткамі прызначаная для паразы нерухомых і рухомых сучасных браняваных цэляў з дынамічнай абаронай, невялікіх караблёў (катараў) і нізкалётных паветраных цэляў. Ракета не саманаводная - яна наводзіцца на цэль лазерным промнем.

Максімальная далёкасць стральбы ракетай складае 10 км. Маса ракеты 62 кг, баявой часткі - 38 кг. Даўжыня транспартна-пускавога кантэйнера - 2144 мм, дыяметр ТПК - 190 мм. Процітанкавы варыянт Р-10-К абсталёўваецца 152-мм тандэмнай кумулятыўнай баявой часткай з заяўленым бронепрабіваннем 1100 мм па дынамічнай абароне. Ужываць супрацьтанкавую версію мяркуецца, перш за ўсё, з баявых верталётаў.

Зенітная ракета Р-10-ОФ абсталёўваецца 130-мм аскепкава-фугаснай баявой часткай з ударным ядром і бескантактавай выбухоўкай. Яна прызначаная для выкарыстання ў мабільных зенітна-ракетных комплексах. Акрамя таго, ракета здольная прабіць да 120 мм броні. Хуткасць ракеты, абсталяванай двума рухавікамі, складае 750 м/з.

ЗША дапамогуць Украіне біць Пуціна, як дапамаглі хаўруснікам біць Гітлера

Сенатарка ЗША Джын Шахін прадставіла законапраект аб ленд-лізе для абароны дэмакратыі ва Украіне. Ініцыятыва з'явілася пасля нядаўняй паездкі дэлегацыі амерыканскіх парламентарыяў ва Украіну. Законапраект павінен надзяліць прэзідэнта ЗША пашыранымі паўнамоцтвамі хутчэй укладаць пагадненні ленд-лізу непасрэдна з Украінай і паскараць пастаўкі вайсковага абсталявання.

Практыка «ленд-ліз» шырока выкарыстоўвалася ў гады Другой сусветнай вайны, калі ЗША на часткова бясплатнай аснове забяспечвалі зброяй і стратэгічнымі матэрыяламі хаўруснікаў у антыгітлераўскай кааліцыі.

Раней Дэярждэп ЗША дазволіў тром хаўруснікам па NATO, краінам Балтыі перадаць Украіне зброю амерыканскай вытворчасці. Таксама надаць нашай краіне вайсковую дапамогу мае намер урад Чэхіі.

Ва Украіне сфармуюць больш за 150 батальёнаў тэрытарыяльнай абароны

У складзе Сіл тэрытарыяльнай абароны УСУ прадаўжаецца фармаванне 25 брыгад (адзін рэгіён - адна брыгада), якія будуць аб'ядноўваць больш за 150 батальёнаў (адзін батальён на раён). Сталая колькасць сіл ТРА ў мірны час складзе 10 тысяч вайскоўцаў. Па штаце асаблівага перыяду падраздзяленні сіл ТРА будуць налічваць больш за 130 тысяч чалавек, для чаго сфармуюць адпаведны рэзерв.

Са слоў міністра абароны Аляксея Рэзнікава, разгортванне сістэмы ТРА будзе адбывацца ў некалькі этапаў. Спачатку брыгады і батальёны будуць разгортвацца па штаце мірнага часу. Гэта адбываецца проста цяпер. У кожным батальёне фармуецца «шкілет» з вайскоўцаў УСУ. Іх задачай з'яўляецца камандаванне, навучанне і ўзгадненне грамадзянскіх асоб, якія ўкладуць кантракт аб службе ў рэзерве ТРА. За кошт гэтых рэзервістаў кожны батальён будзе налічваць да 600 чалавек.

Фармаванне рэзерву ТРА па штатах асаблівага перыяду - наступны этап пасля стварэння ў батальёнах і брыгадах арганізацыйна-кіраўніцкага ядра. За тымі, хто ўкладзе кантракт і будзе служыць у рэзерве ТРА, замацуюць зброю. Яна будзе выдавацца на час вучэнняў ці ў выпадку ўзнікнення пэўных сітуацый.

У Мінабароны таксама адзначылі, што найбліжэйшым часам яно арганізуе навучанне і ўзгадненне з удзелам кіраўнікоў органаў мясцовай улады і самакіравання. Першымі плануецца прыцягнуць гарадскіх кіраўнікоў абласных цэнтраў.