Выйшла кніга пра беларускія буквары, матэрыялы для якой збіраліся па ўсім свеце
4- 23.01.2022, 14:40
- 3,536
Як вучылі чытаць маленькіх беларусаў - ад старажытнасці да нашых дзён.
У даследаванні гісторыка, намесніка дырэктара Нацыянальнай бібліятэкі Алеся Сушы сабраная ўся гісторыя першых айчынных кніг для тых, хто вучыцца чытаць, ад старажытнасці да нашых дзён. Пра гэта напісаў сам аўтар у сябе ў Фэйсбуку.
Як кажа сам аўтар, ён пісаў гэтую кнігу пяць гадоў, «ёй аддаваўся амаль поўнасцю так шмат дзён, месяцаў, гадоў…, удзень і ўначы, на выхадных і ў адпачынку, дома і ў дарозе». Задумвалася гэта ўсё, як лёгкая праца да 400-годдзя першай кнігі пад назвай «Буквар», у выніку атрымалася ж паўнавартасная манаграфія на 336 старонак вялікага фармату.
Са слоў Алеся Сушы:
«Кніга сабрала ўсю гісторыю айчынных падручнікаў для пачатковага навучання ад старажытнасці да нашых дзён. Вялікая доля помнікаў зусім невядомая нават даследнікам, а іх ілюстрацыі публікуюцца ўпершыню.
Каб сабраць звесткі аб беларускіх букварах, аўтару давялося аб'ехаць шмат краін, працаваць у дзясятках бібліятэк, музеяў, архіваў, шукаць у прыватных зборах і калекцыях, бо даўнія (ды і адносна сучасныя) беларускія падручнікі выключна слаба захаваліся ў самой Беларусі (што там, амаль не захаваліся).
Па факце былі выкарыстаныя ілюстрацыі з 78 дзяржаўных і прыватных калекцый у Беларусі, Аўстрыі, Вялікай Брытаніі, Нямеччыне, Даніі, Ірландыі, Італіі, ЗША, Латвіі, Літве, Польшчы, Расеі, Славеніі, Украіне, Францыі, Чэхіі і Швэцыі».