Кіберпартызаны выставілі новы ультыматум уладам і БЧ
26- 26.01.2022, 13:43
- 44,366
Сетка Беларускай чыгункі можа быць зноў атакаваная.
«Кіберпартызаны» заявілі аб нападзе на камп'ютарную сетку Беларускай чыгункі, пасля чаго з'явілася інфармацыя, што ў Беларускай чыгунцы здарыўся збой сістэмы: перасталі працаваць серверы і ўнутраныя сэрвісы, білеты можна набыць толькі праз білетныя касы.
Журналісты «Белсату» паразмаўлялі з прадстаўніком суполкі кіберпартызанаў пра гэтае здарэнне.
- Ці слушна мы разумеем, што без ключоў шыфравання Беларуская чыгунка не можа працаваць у звыклым рэжыме і адновіцца ад гэтай атакі няхутка?
- Мы дапускаем, што нягледзячы на тое, што мы выдалілі 100 тэрабайтаў бэкапаў баз звестак, у БЧ знойдуцца не выдаленыя копіі часткі баз, і магчыма ў іх атрымаецца іх часткова аднавіць, але гэта зойме як мінімум некалькі тыдняў, і ўсё адно застануцца базы, якія давядзецца збіраць з нуля. А калі нашыя патрабаванні не будуць выкананыя, не выключана, што сетка можа быць атакаваная зноў.
– Якія наступствы вашыя дзеянні панеслі для чыгункі і ўвогуле для ўладаў?
- З нашай інфармацыі ўжо пачаліся затрымкі цягнікоў. Мы мяркуем, што ў найбліжэйшыя дні і тыдні затрымак будзе яшчэ больш, пакуль сетка і сістэмы БЧ не вернуцца ў штатны рэжым.
- Ці атрымалі вы ўжо нейкі адказ ад чыгункі ці ад рэжыму?
- Прадстаўнікі рэжыму пакуль не выходзілі з намі на сувязь.
- Вы паставілі пэўныя ўмовы рэжыму, рэальна разлічваеце што можа атрымацца?
- Я думаю, ім трэба яшчэ некалькі дзён, каб усвядоміць сур'ёзнасць шкоды, і прыняць пастанову аб далейшых сваіх кроках. Чым даўжэй яны будуць чакаць, тым горшай будзе іх сітуацыя. Нашы прадстаўнікі гатовы ў кожны момант прыняць ад іх заяўку на разблакаванне сеткі і спыненне кібератак.
- Наколькі складана было гэта зрабіць з тэхнічнага пункту гледжання?
- Кібератака на сетку БЧ была значна складанейшая за атакі сеткі МУС, бо базы звестак трэба было не толькі чытаць, але і пісаць у іх, а яшчэ і знайсці ўсе бэкапы і знішчыць ці зашыфраваць іх. Гэтая аперацыя была адной з самых складаных нашых кібераперацый.
Кібератаку 24 студзеня кіберпартызаны патлумачылі тым, што ў гэтыя дні «рэжым Лукашэнкі прапускае акупацыйныя войскі на нашу зямлю».
«У рамках кіберкампаніі «Пекла» мы зашыфравалі асноўную частку сервераў, баз звестак і працоўных станцый БЧ з мэтай запаволіць і парушыць працу дарогі. Бэкапы знішчаныя», - заявілі праз канал «Кіберпартызаны».
Паведамляецца, што пад кібератаку падпалі дзясяткі баз звестак. Аўтаматыка і сістэмы бяспекі свядома не былі закранутыя кібератакай, каб пазбегнуць аварыйных сітуацый.