УСУ зачынілі «вечка катла» для групоўкі арміі РФ у Лімане
12- 1.10.2022, 8:20
- 25,994
Вораг акружаны.
Узброеныя сілы Украіны зачынілі «вечка катла» для групоўкі расейскіх войскаў у часова непадкантрольным Лімане на Данеччыне.
Пра гэта пішуць украінскія СМІ і сведчыць мапа, апублікаваная «Люстэркам тыдня».
Выданне спасылаецца на крыніцы, што знаходзяцца непасрэдна ў зоне баявых дзеянняў, якія пацвярджаюць інфармацыю пра акружэнне расейцаў.
Адзначаецца, што ў размешчаных у Лімане расейскіх падраздзяленняў наўрад ці атрымаецца выбрацца з «катла», паколькі ў іх адсутнічае неабходнае для прарыву ўзбраенне.
Акрамя таго, перахопы ўкраінскай выведкі сведчаць пра вельмі нізкі ўзровень маральнага стану асабовага складу расейскіх падраздзяленняў, якія апынуліся ў акружэнні.
Раней пра запланаваны прарыў расейскай групоўкі войскаў з акружэння масава пісалі расейскія СМІ і паблікі ў сацсетках.
Пра поспехі УСУ на Усходнім фронце паведаміў у вечаровым відэазвароце і прэзідэнт Украіны Уладзімір Зяленскі.
«Пра гэта дастаткова публічнай інфармацыі. Усе чулі, што адбываецца ў Лімане Данецкай вобласці», – сказаў кіраўнік дзяржавы і дадаў, што гэтыя крокі значаць вельмі шмат для Украіны.
Раней у пятніцу стала вядома, што ўкраінскія вайскоўцы ўзялі пад кантроль населеныя пункты Ямполь і Дробышава на подступах да Лімана.
У сваю чаргу расейскія СМІ пісалі, што баі ідуць ужо на адміністрацыйных межах Лімана, а дарога каля Торскага ў бок Крамянной знаходзіцца пад агнявым кантролем украінскай артылерыі.
Пра акружэнне падраздзяленняў расейскіх войскаў у Лімане паведаміў і расейскі дыверсант, былы афіцэр ФСБ Ігар Гіркін (Стралкоў).