Расейскае камандаванне «кінула» акружаных у Лімане салдатаў
15- 1.10.2022, 10:44
- 31,616
Гарнізону не далі дазволу на адыход з «катла».
Расейскія вайскоўцы запыталі ў свайго камандавання дазвол на выхад з Лімана Данецкай вобласці, але атрымалі адмову. Цяпер усе шляхі падвозу боепрыпасаў акупантаў перакрытыя Сіламі абароны Украіны.
Пра гэта раніцай 1 кастрычніка ў эфіры тэлеканала «FREEДОМ» паведаміў кіраўнік Луганскай АА Сяргей Гайдай, паведамляе obozrevatel.com. Паводле ягоных словаў, у сітуацыі, якая склалася, у захопнікаў засталіся тры варыянты.
«Або паспрабаваць прарвацца, або здацца, або ўсім там побач загінуць», – сказаў ён.
Гайдай адзначыў, што ў раёне гэтага горада застаюцца, папярэдне, блізу 5 тысячаў вайскоўцаў варожай арміі і гэта «каласальная групоўка».
«Усе шляхі ўжо падвозу туды боекамплекту або спакойнага выхаду гэтай групоўкі з Лімана – яны ўсё цалкам перакрытыя», – дадаў кіраўнік Луганскай абласной ваеннай адміністрацыі.
Гайдай жартам выказаў здагадку, што затрыманыя ў Лімане акупанты могуць прадэманстраваць яшчэ адну «спецаперацыю» ў «адмоўным наступе».
Нагадаем, днём 30 верасня журналіст Юрый Бутусаў паведаміў, што захопнікі сабралі калону тэхнікі ў сяле Зарэчнае пад Ліманам, каб паспрабаваць прарвацца ў Торскае і такім чынам выйсці з акружэння.
Журналіст адзначыў, што на ўказаную дарогу захопнікі сцягнулі баявую тэхніку УС РФ, а таксама скрадзены ў мірных жыхароў цывільны транспарт.