Ілан Маск паказаў робата-гуманоіда Optimus, які станцаваў перад прысутнымі

Андроід будзе прадавацца з коштам меншым за $ 20 тысячаў.

Падчас начной прэзентацыі Tesla AI Day 2022, якую кіраўнік кампаніі Ілан Маск фармальна назваў мерапрыемствам для прываблівання таленавітых кадраў, на сцэне ў Апала-Альта з'явіліся два прататыпы чалавекападобнага робата Optimus, якія ўмоўна адносяцца да розных пакаленняў. У серыйным выкананні такія робаты змогуць выпускацца мільённымі тыражамі і прапаноўвацца коштам меншым за $ 20 000, як перакананы кіраўнік Tesla.

Падобная заява тым больш амбіцыйная, калі ўзяць да ўвагі, што цяпер кошт чалавекападобных робатаў перавышае $ 100 000 у самым лепшым выпадку. Ілан Маск заявіў, што цяперашнія чалавекападобныя робаты канкурэнтных марак "пазбаўленыя мозгу", а Optimus павінен стаць "вельмі здольным робатам", паколькі будзе кіравацца сістэмай штучнага інтэлекту, якую Tesla цяпер адладжвае на прыкладзе сістэмы аўтаматычнага кіравання электрамабілямі.

Першы прататып, які ўдзельнічаў у прэзентацыі і пазбаўлены вонкавых панэляў корпуса, мог самастойна перасоўвацца па сцэне на дзвюх нагах і махаць рукамі ў такт музыцы, хоць Маск у выніку і прызнаўся, што робат упершыню прайшоўся па паверхні без страхавальных апораў менавіта падчас прэзентацыі. Было заўважна, як Ілан Маск хвалюецца з нагоды здольнасці робата самастойна сысці ўглыб сцэны, кіраўнік кампаніі нават збянтэжана растлумачыў, што ягоныя калегі не хацелі дапусціць падзення прататыпа тварам уніз. Паводле словаў Маска, прататып робата першага пакалення выкарыстаў выканальныя механізмы іншай вытворчасці, але прататып другога пакалення ўжо атрымаў выканальныя механізмы ўласнай распрацоўкі Tesla.

Другі прататып, паказаны публіцы, быў дастаўлены на сцэну пры дапамозе вазка, пакуль ён не можа хадзіць самастойна, але Маск паабяцаў, што робат навучыцца гэтаму праз некалькі тыдняў. Асаблівасцю другога прататыпа была не толькі больш прэзентабельная знешнасць, але і наяўнасць пясцяў рук, якія прапорцыямі нагадваюць чалавечыя. Падвешаны на апоры робат рабіў рухі не толькі рукамі і галавой, але і нагамі. Паводле словаў Маска, гэты прататып даволі блізкі да серыйнага варыянту з гледзішча ступеняў свабоды руху. У ідэале Tesla паспрабуе стварыць робата, рукі якога маюць 27 ступеняў свабоды, а цела – блізу 28 супраць больш за 200 у чалавека.

Перад распрацоўнікамі Tesla цяпер стаіць задача ўдасканаліць маніпулятары, каб робат змог выконваць многія заданні, якія дазваляюць яму замяніць чалавека ў пэўных сферах дзейнасці. Было таксама прадэманстраванае відэа, дзе робат першага пакалення палівае кветкі ў офісе, пераносіць скрынкі і паднімае металічныя брускі на прадпрыемстве ў Каліфорніі, дзе вырабляюцца электрамабілі Tesla. Пры гэтым за спінай прататыпа відаць страхавальны трос, які прадухіляе ягонае падзенне.

Перад інжынерамі кампаніі таксама пастаўленая задача стварыць батарэю, якая змяшчалася б у корпус робата і дазваляла б яму за кошт дасягнення ёмістасці 2,3 квт•г працаваць цэлы дзень без падзарадкі пры намінальнай напрузе 52 В. Масу робата плануецца ўтрымаць у межах 73 кг. З іншых асаблівасцяў былі згаданыя намаганні адмыслоўцаў Tesla ў аптымізацыі канструкцыі робата падчас віртуальных краш-тэстаў, якія імітуюць падзенне робата тварам уніз. Інжынеры дамагліся, каб пры гэтым канструкцыя і асноўныя датчыкі і прывады робата не пакутавалі і ён захоўваў працаздольнасць. У торсе робата таксама размешчаны бартавы кампутар на базе фірмовага працэсара Tesla з высокай ступенню інтэграцыі і падтрымкай бесправадных інтэрфэйсаў Wi-Fi і LTE. Спецыялісты Tesla таксама расказалі на мерапрыемстве аб асаблівасцях распрацоўкі суставаў, канечнасцяў і электрамеханічных прывадаў робата, а таксама алгарытмаў кіравання.

Паводле традыцыі, Ілан Маск не змог абысці бокам утапічныя развагі пра светлую будучыню, у якую ўсё чалавецтва прывядуць падобныя робаты. Паводле ягоных словаў, робаты Tesla, якія выпускаюцца мільёнамі штук, дапамогуць пабудаваць грамадства багацця, у якім не будзе беднасці. Пры гэтым публічны характар капіталу Tesla дазваляе грамадству кантраляваць дзейнасць кампаніі, як перакананы яе кіраўнік. «Калі я звар'яцею, вы зможаце мяне звольніць. Гэта важна. Магчыма, я звар’яцеў», – растлумачыў Ілан Маск. Ён таксама дадаў, што на пасадзе Tesla не можа рабіць усё, што яму захочацца, нават калі такое меркаванне існуе.