Брытанская выведка расказала, чым павернецца страта Лімана для генералаў РФ

Уцёкі рэштак расейскага войска з горада – не проста аператыўная параза.

Адыход расейскіх войскаў з Лімана Данецкай вобласці з'яўляецца не толькі аператыўнай паразай для акупантаў. Гэта таксама і палітычная няўдача для РФ.

Пра гэта паведамляе Міністэрства абароны Вялікай Брытаніі ў Twitter.

Як мяркуюць у брытанскай выведцы, абаранялі Ліман неўкамплектаваныя падраздзяленні Заходняй і Цэнтральнай ваенных акруг РФ, а таксама кантынгент добраахвотна мабілізаваных рэзервістаў.

«Сілы, верагодна, панеслі значныя страты, калі адышлі адзінай дарогай з горада, якая ўсё яшчэ была ў руках расейцаў», – гаворыцца ў паведамленні.

Брытанцы падкрэсліваюць, што ў аператыўным плане Ліман важны, паколькі ён кантралюе ключавы шлях праз раку Северскі Данец, па якой Расея спрабуе ўмацаваць сваю абарону.

«Адыход Расеі з Лімана таксама з'яўляецца значнай палітычнай няўдачай, беручы да ўвагі, што ён размешчаны ў Данецкай вобласці, рэгіёне, які РФ нібыта імкнулася “вызваліць” і які яна спрабавала незаконна анэксаваць», – падкрэслівае выведка.

Адзначана, што такая выснова прывяла да чарговай хвалі публічнай крытыкі ваеннага кіраўніцтва РФ з боку найвышэйшых службовых асобаў.

«Далейшыя страты тэрыторыі на незаконна акупаваных тэрыторыях амаль напэўна прывядуць да ўзмацнення гэтай публічнай крытыкі і ўзмоцняць ціск на старэйшае камандаванне», – мяркуюць у выведцы Брытаніі.

Нагадаем, учора стала вядома, што ўкраінскія вайскоўцы ўзялі Ліман пад свой кантроль, адпаведнае відэа байцы УСУ апублікавалі ў сетцы, а вызваленне горада пацвердзіў і прэзідэнт Украіны.