З'явіліся падрабязнасці інцыдэнту ў Барысаве, дзе кандуктарка збіла пасажыра

Рыхтуюцца дакументы на яе звальненне, але не за факт агрэсіі.

У Сеціве з'явілася відэа, на якім кандуктарка аўтобуса ў Барысаве з выкарыстаннем нецэнзурнай лексікі штурхае пасажыра. Мужчына просіць кіроўцу аб дапамозе, іншыя пасажыры здымаюць тое, што адбываецца, на відэа.

Са слоў відавочцаў, мужчына не знайшоў манет, каб расплаціцца за праезд без рэшты. Кандуктарка вельмі моцна раззлавалася.

- Мы ў жаху ад гэтай сітуацыі і просім прабачэння ў пасажыра, - пракаментаваў сітуацыю МЛЫН.By дырэктар філіяла «Аўтобусны парк № 3» ААТ «Мінаблаўтатранс» Аляксандр Слаёк. - Але разабрацца да канца ў сітуацыі пакуль няма магчымасці. Гэтая кандуктарка ўжо пяты дзень не выходзіць на працу і на тэлефонныя званкі не адказвае.

Са слоў дырэктара, цяпер рыхтуюцца дакументы на яе звальненне - але не за агрэсію ў дачыненні да пасажыра, а за прагулы.