Барыс Джонсан атрымаў новую пасаду, звязаную з Украінай

У Кіеве экс-прэм'ера Вялікабрытаніі называюць вялікім сябрам.

Экс-прэм'ер Вялікабрытаніі Барыс Джонсан стане новым кіраўніком групы сяброўства Кансерватыўнай партыі з Украінай.

Пра гэта піша агенцтва «Еўрапейская праўда».

Цяперашні кіраўнік групы, былы міністр культуры Джон Вітынгдэйл, абвясціў пра свайго пераемніка на палях з'езда Кансерватыўнай партыі.

Паводле ягоных слоў, Джонсан - «шмат у чым відавочны і найбольш годны чалавек, каб узначаліць гэтую арганізацыю, бо ён быў першым чалавекам, не толькі ў гэтай краіне, але і ва ўсім заходнім свеце, які так рашуча выступіў у падтрымку ўкраінскага народа».

Сам Джонсан не ўдзельнічаў у мерапрыемстве. «Барыс шкадуе, што не можа быць з намі сёння, але ён выказаў сваю поўную падтрымку таму, у што мы ўсе верым і нашай далейшай падтрымцы Украіны», - сказаў Вітынгдэйл.

Пасля адстаўкі з пасады прэм'ер-міністра Джонсана прэзідэнт Уладзімір Зяленскі заявіў, што разлічвае на супрацоўніцтва з ім «у яго новым статусе».