УСУ абрынулі абарону РФ на поўначы Херсонскай вобласці і развіваюць наступ у Луганскай

Амерыканскія аналітыкі расказалі пра прарыў украінскага войска на двух адрэзках фронту.

УСУ прадаўжаюць дамагацца значных поспехаў у Херсонскай вобласці, адначасова прадаўжаючы наступ у Харкаўскай і Луганскай абласцях.

Пра гэта ў сваёй новай зводцы паводле вынікаў 4 кастрычніка паведамляе амерыканскі Інстытут вывучэння вайны (ISW).

У Херсонскай вобласці ўкраінскія войскі вызвалілі некалькі населеных пунктаў на ўсходнім беразе ракі Інгулец уздоўж трасы Т2207, прымусіўшы войскі РФ адступіць на поўдзень у бок Херсона. Украінскія сілы таксама прадаўжаюць прасоўвацца на поўдзень уздоўж ракі Днепр і трасы Т0403, перарэзаўшы дзве расейскія наземныя лініі камунікацый (GLOK) на поўначы Херсонскай вобласці і адціснуўшы расейцаў на поўдзень ад мяжы Херсонскай і Днепрапятроўскай абласцей у раён Берыслава. Адначасова УСУ прыкладваюць намаганні, каб перашкодзіць спробам Расеі перакінуць дадатковыя боепрыпасы, рэзервы, мабілізаваных вайскоўцаў і сродкі абароны на перадавыя пазіцыі.

Замацаванне пазіцый УСУ на ўсходнім (левым) беразе ракі Інгулец і на правым беразе Кахоўскага вадасховішча дазволіць украінскім сілам істотна адціснуць расейскія войскі да Дняпра на ўсход і выцесніць іх на поўдзень у бок Херсона і раёна Берыслаў – Новая Кахкова, піша ISW, абагульняючы перасцярогі расейскіх блогераў.

Аналітыкі інстытута таксама аналізуюць звесткі аднаго з такіх «ваенкараў», паводле сцвярджэння якога для абароны 20-кіламетровай лініі фронту патрабуецца 500 чалавек з разліку прыкладна 20 м на чалавека, аднак на поўначы Херсонскай вобласці праз недаўкамплектаванасць батальёнаў РФ гэтыя суадносіны складае адзін салдат на 60 м лініі фронту. Гэты факт нараўне з эфектыўнымі ўкраінскімі наступальнымі аперацыямі «часткова тлумачыць хуткі тэмп краху арміі РФ на гэтым адрэзку», адзначаюць эксперты Інстытута.

У Харкаўскай і Луганскай абласцях вобласці УСУ прадаўжаюць наступ на ўсход ад ракі Аскол, паводле звестак расейскіх крыніцаў баі прадаўжаюцца ў раёне трасы R66 Сватава – Крэмень (абодва гэтыя гарады знаходзяцца ўжо ў Луганскай вобласці). Украінскія войскі ўвайшлі ў Багуслаўку і Бароўскую Андрэеўку (30 км на захад ад Сватава). «Гэтыя поспехі нараўне з іншымі наступамі УСУ на ўсходнім беразе ракі Аскол, у сутнасці пазбавілі расейскія сілы магчымасці выкарыстоўваць раку ў якасці лініі абароны», – піша ISW, канстатуючы, што харкаўскі фронт цяпер фактычна стаў луганскім (што прызнаюць нават расейскія «ваенкары»-прапагандысты).