Расейскі рынак акцый абрынуўся на чутках аб планах Пуціна

Кіраўнік Крамля можа змяніць статус «спецаперацыі» ва Украіне.

Расейскі рынак запанікаваў на чутках аб новым звароце Пуціна, паведамляе выданне Finanz.

«Не паспеўшыя збегчы ад мабілізацыі трэйдары расейскага фондавага рынку дрыготкімі рукамі капаюць валакардзін на фоне чутак аб тым, што прэзідэнт РФ Уладзімір Пуцін можа зноў звярнуцца да нацыі», – адзначана ў паведамленні.

Індэкс Маскоўскай біржы на ранішніх таргах абрынуўся на 3,6, дзякуючы сінхроннаму падзенню ўсіх блакітных фішак. Гонку на «дно» ўзначалілі найбуйнейшая расейская нафтавая кампанія «Раснафта» (-6,6%) і «Саўкамфлот» (-7%), якім трэба будзе перажыць новыя санкцыі ЕЗ са «столлю цэн» расейскай нафты. Ашчадбанк часам падаў на 3,9%, «Газпром» - на 3,7%.

«Інвестары скарачаюць пазіцыі на чутках аб новым звароце прэзідэнта РФ да грамадзян», – пішуць аналітыкі ПСБ.

Пра тое, што Пуцін можа паведаміць аб «змяненні статусу спецаперацыі», раніцай у сераду паведаміла прапагандысцкае выданне Readovka. Практычна адначасова сакратар Савета бяспекі РФ Мікалай Патрушаў заявіў аб планах Захаду перанесці вайну на тэрыторыю Расеі, а таксама назваў пагрозай Крыму актыўнасць NATO

Раней аб магчымым звароце Пуціна ў пачатку кастрычніка расказвалі крыніцы выдання «Ведомости» ў Крамлі.