Свежая мапа баявых дзеянняў ад брытанскай выведкі: дзе наступаюць УСУ
2- 5.10.2022, 19:42
- 27,882
Абнародаваная актуальная мапа баявых дзеянняў ва Украіне.
Байцы Узброеных сіл Украіны актыўна наступаюць на поўдні і ўсходзе краіны. Пры гэтым расейцы спрабуюць прадоўжыць акупацыю Данецкай вобласці. Пра гэта паведамляе РБК-Украіна са спасылкай на мапу, якую апублікавала Мінабароны Брытаніі ў Twitter.
Паводле звестак брытанскай выведкі, украінскія вайскоўцы працягваюць наступаць ва ўсходняй частцы Харкаўскай вобласці, якая ўсё яшчэ знаходзіцца пад кантролем расейцаў. Таксама штурмавыя дзеянні байцы УСУ праводзяць і на ўсход ад Лімана (Данецкая вобласць).
Пры гэтым расейскія акупанты спрабуюць рушыць наперад у Данецкай вобласці на Славянскім накірунку і непадалёк ад пасёлка Пяскоў.
На поўдні ж наступленне праводзяць толькі ўкраінскія вайскоўцы. Яны ідуць на поўначы Херсонскай вобласці, а таксама ў паўднёва-ўсходняй частцы Мікалаеўскай.
Раней кіраўнік Луганскай АВА Сяргей Гайдай заяўляў, што ў сераду, 5 кастрычніка, украінскія вайскоўцы пачалі дэакупацыю Луганскай вобласці і ім ужо ўдалося вызваліць некалькі населеных пунктаў.