Расея спрабуе развязаць праблемы з сертыфікацыяй дыяментаў з дапамогай Беларусі
4- 5.10.2022, 19:25
- 11,314
Беларусь хоча ўзначаліць міжнародны орган сертыфікацыі дыяментаў.
Беларусь падала заяўку на пасаду намесніка кіраўніка Кімберлійскага працэсу (КП) у 2023 годзе і кіраўніка ў 2024-м. Украіна выступіла супраць і заявіла, што так РФ выкарыстоўвае прыязную да сябе Беларусь, каб расейскія дыяменты не сталі «канфліктнымі» пасля поўнамаштабнага ўварвання Расеі ва Украіну.
Пра гэта піша Reuters са спасылкай на ліст, з якім азнаёмілася гэтае агенцтва.
«Расея намагае на тым, каб Беларусь стала старшынёй, каб інтарэсы Расеі можна было лепш абараняць у рамках Кімберлійскага працэсу», - заявіў прадстаўнік Украіны ў КП Уладзімір Татарынцаў.
Раней некаторыя ўдзельнікі Кімберлійскага працэсу ўжо заклікалі да таго, каб алмазы з Расіі называліся «канфліктнымі».
Аб'яднаныя Арабскія Эміраты таксама падалі заяўку на старшынства ў 2024 годзе ў лісце, з якім азнаёмілася Reuters. ААЭ не ўводзілі санкцый супраць РФ, імкнучыся захаваць, як яны гэта называюць, нейтральную пазіцыю ў дачыненні да расейска-ўкраінскай вайны.
Татарынцаў адзначыў, што Украіна не пярэчыць супраць вылучэння ААЭ, але дадаў, што «наўрад ці хто-небудзь зможа аб'яднаць Кімберлійскі працэс».
Як адзначае Reuters, КП прымае пастанову кансэнсусам, таму раскол вакол Расеі нясе рызыкі паралізаваць гэты орган.
Кімберлійскі працэс - калегіяльны міждзяржаўны орган, які дзейнічае ў адпаведнасці з рэзалюцыямі ААН, нацэленымі на прадухіленне гандлю «канфліктнымі» або «крывавымі» дыяментамі.
Так, КП мае права забараняць экспарт дыяментаў з пэўных краін, як гэта было ў 2013 годзе, калі паўстанцы захапілі ўладу ў Цэнтральнаафрыканскай Рэспубліцы.