Індэкс баршчу ў Менску: Дзе больш выгадна набываць прадукты

Журналісты параўналі кошты на Камароўцы, у гіпермаркеце і ў краме ля дома.

З надыходам асенне-зімовага перыяду і неўнікнёных халадоў, душа і цела нярэдка просяць чагосьці смачнага, гарачага і... хатняга. Як варыянт – буракі! Раз на сезон «Камсамолка» лічыць са сваімі чытачамі «індэкс баршчу».

Журналісты паглядзелі, колькі каштуе базавы набор прадуктаў для гэтага супу ў краме фармату «каля дома», у найбліжэйшым гіпермаркеце і, зразумела, на рынку – цэнтральным, менскім – Камароўцы.

Крама «Ля дома»: «ЗАЛАТАЯ» ПЯТРУШКА

«Варыць» будзем вельмі вялікі рондаль буракоў, таму арыентуемся на кошты прадуктаў за кілаграм.

Такім чынам, аснова – буракі: каштуюць яны тут 71 капейку, цалкам прыстойна выглядаюць, пругкія. Само сабой, беларускія. Кілаграм рэпчатай цыбулі, яна таксама нараканняў не выклікае, абыдзецца на 1 рубель 40 капеек. Побач морква, сярэдняга памеру: 85 капеек – і кілаграм карыснай гародніны ваш. Спатрэбіцца і бульбачка, куды без яе!? 71 капейка за кіло, капуста таксама ёсць, праўда, качаны не самыя маленькія, а кілаграм каштуе 0,85 рубля.

Часнок, як сігналізуе цэтлік, кітайскай вытворчасці: 8 рублёў 23 капейкі, бярэм галоўку на 100 грамаў (82 капейкі). Паблізу – турэцкія таматы, невялікага памеру. Яны якраз на зніжцы (8%), і кілаграм, які патрэбны, каштуе 5,99 рубля. Трохі энэргіі і настойлівай мэтанакіраванасці – і можна знайсці пятрушку (боршч будзем гатаваць абавязкова з зелянінай). Праўда, кошт, «кусаецца»: 40-грамавая ўпакоўка абыдзецца на 1,27 рубля. А хацелася б дзве...

Праблемы ўзніклі з ялавічынай (мы мэтанакіравана шукаем лапатачную частку і ніякую іншую). Ялавічыны няма, але гэта крама крокавай даступнасці, вялізнага асартыментнага шэрагу там ніхто і не чакае. Але побач ёсць яшчэ адна крама – фірмовы гандлёвы пункт аднаго з беларускіх мясакамбінатаў. 20 рублёў 32 капейкі папаўняюць нашы выдаткі, а кілаграм мяса – наш кошык.

Усё! Увесь базавы набор прадуктаў набыты, лічым, колькі заважыць рондаль духмянага наварыстага баршчу, выходзіць – 42 рублі 23 капейкі.

Гіпермаркет: кіло ялавічыны за 24 рублі без адной капейкі

У гіпермаркеце адразу ж бярэм ялавічыну. Яна тут нятанная, назваць выбар уражлівым цяжка. Так ці інакш, кіло – 23 рублі 99 капеек.

Бурак ёсць двух відаў: «цыліндрычны, Беларусь» і «буракі, Беларусь», першы каштуе 97 капеек, другі – 69 капеек. Бярэм другі, увогуле, будзем арыентавацца на самыя танныя прадукты ў сваёй катэгорыі. Кіло «проста буракоў» кладзем у кошык (0,69 BYN).

Бярэм самыя недарагія памідоры: ёсць за 6,89 рубля, ёсць за 4,71, апошнія займаюць сваё ганаровае месца ў кошыку. На прылаўку чатыры віды кітайскага часнаку, адрозніваюцца яны, з усяго відаць, галоўным чынам, фасоўкай, каштуюць 7,99 рубля.

100-грамавая галоўка абыходзіцца на 80 капеек. Кілаграм белакачаннай капусты – 69 капеек (дарэчы, у гіперы, як высветлілася, самая танная капуста). Яшчэ бярэм кілаграм цыбулі – 1,21 рубля, і кілаграм морквы і бульбы. У кошце яны дзіўна аднадушныя – і тое, і іншае каштуе 71 капейку. Сто грамаў свежай пятрушкі можна ўзяць нават на вагу: выйшла + 2 рублі 15 капеек.

Настала гадзіна калькуляцыі, вынік якой – 35 рублёў 66 капеек.

КАМАРОЎКА: КЛАСНЫЯ БЕЛАРУСКІЯ ПАМІДОРЫ З ПІНСКА ЗА 5 РУБЛЁЎ

Набыць прадукты для баршчу на цэнтральным рынку Менска, Камароўцы, можна без праблемаў. Ды і настрой там вось-вось стане пераднавагоднім.

Адзінае: прадаўцы, якія гандлююць гароднінай-садавіной, зелянінай перабраліся на тэрыторыю крытага рынку, зіма не за гарамі, а першы тэмпературны мінус ужо здарыўся.

Такім чынам, што прапануе рыначны гандаль? Цыбуля – 2 рублі за кіло, моркву можна знайсці і за 2 рублі, і за 1 рубель, ёсць нават за 99 капеек, яе і бярэм. Багаты выбар бульбы, кошты яе адрозніваюцца: хочаш – два рублі за кіло, хочаш – 1,89, хочаш – паўтара. Мы ж хочам за 1 рубель 29 капеек, яна небуйная, ну, у суп жа ўсё роўна рэзаць, для нашых мэтаў падыдзе.

Цешаць вока памідоры. Кошты – розныя: ёсць за 10,95, ёсць за 9,45. Вельмі класна выглядаюць беларускія (зразумела, з Пінска) таматы за 5-6 рублёў, але прынцып ёсць прынцып, спыняем выбар на тых, якія каштуюць танней за іншыя – 3,5 рубля.

Памідоры з Пінска яшчэ можна набыць. Фота: чытач «КП», носіць ілюстрацыйны характар.

Мяркуючы з цэтліка – таксама беларускія, хіба што не самыя яркія і буйныя.

Што тычыцца часнаку, то і тут разбежка коштаў даволі вялікая: кілаграм можа каштаваць нават 15 рублёў, сярэдні ж кошт – BYN 12 за кіло. Калі пабадзяцца па шэрагах, то сустракаюцца прапановы яшчэ больш выгадныя: 9,99 рубля. 100-грамовая галоўка часнаку заважыць на 99 капеек. Кілаграм буракоў абыдзецца на тыя ж 99 капеек, а вось капусту танней за 1 рубель 9 капеек, здаецца, не знайсці.

У адрозненне ад гіпермаркета і «прыдамавой» крамы, на Камароўцы выдатны выбар мяса, лапатачная частка ялавічыны абыдзецца на 20 рублёў, але рубель без праблемаў і асаблівага гандлю прадаўцы скідаюць. Увогуле, адборная ялавічына за 19 рублёў папаўняе і без таго пустую торбу з прадуктамі. Ледзь не забыліся на пятрушку! 100 грамаў абыдзецца на 1 рубель 20 капеек.

Разам рондаль «камароўскага баршчу» выльецца на 31 рубель 5 капеек.

Увогуле, 42 рублі 23 капейкі каштуе «баршчавы» набор, калі набываць усе прадукты для яго ў крамах «каля дома»; той самы пералік, але набыты ў сеткавым гіпермаркеце, абыдзецца на 35 рублёў 66 капеек. Калі выправіцца на Камароўку і закупіцца там, то гаманец страціць 31 рубель 5 капеек, затое торба прадуктаў істотна папоўніцца.

А што калі паставіць за мэту зэканоміць максімальна? Не пашкадаваць часу і адшукаць самыя недарагія прадукты. Тады ў гіперы мае сэнс набыць цыбулю (1,21 рубля), моркву (0,71), там жа і часнок (80 капеек), капусту (0,69). Там жа трэба ўзяць і бурак – танней, чым 69 капеек за кілаграм не знайсці больш нідзе.

У крамах крокавай даступнасці набываем бульбу, яе, дарэчы, можна набыць і ў гіпермаркеце, кошт – аднолькавы, 71 капейка за кіло. На Камароўцы набываем ялавічыну (19 рублёў), пятрушку (на рынку яна значна таннейшая, чым у любой краме, 1,2 рубля за 100 грамаў), памідоры – 3,5 рубля. Сума – 28 рублёў 51 капейка. Увогуле, рэч за малым – узяць і зварыць круты духмяны і наварысты боршч!