Украінскае войска атакавала тылы войскаў РФ на лініі Сватава – Крамянная

Актуальныя мапы баёў на 26 лістапада

Расейцы спрабуюць ачапіць Бахмут і прадаўжаюць абстрэлы па ўсёй лініі фронту. УСУ б'юць ім па тылах і адбіваюць атакі ворага.

Пра гэта паведамляе Інстытут вывучэння вайны (ISW).

Контрнаступ УСУ на захадзе Луганскай вобласці

З 24 да 25 лістапада расейскія войскі здзейснілі абмежаваныя контратакі для вяртання страчаных пазіцый на паўночны захад ад Сватава. Намеснік кіраўніка Галоўнай аператыўнай управы Генштаба Узброеных сілаў Украіны брыгадны генерал Аляксей Громаў 24 лістапада паведаміў, што расейскія войскі прадаўжаюць спробы адбіць пазіцыі вакол Купянска. 25 лістапада ўкраінскі Генштаб адзначыў, што іх войскі адбілі расейскія атакі на Стальмахоўку.

Расейскія крыніцы таксама шырока сцвярджалі, што расейскія войскі пачалі наступ на Навасёлаўскае 24 лістапада, а расейскія войскі ўвайшлі ў населены пункт і пачалі ўмацоўваць пазіцыі 25 лістапада, каб перакрыць доступ украінцаў да трасы P07, якая праходзіць у Сватаве.

24 лістапада расейскі ваенны карэспандэнт апублікаваў фатаграфіі расейскіх акопаў і бетонных умацаванняў «Зубы цмока» ў раёне Сватава, адзначыўшы, што артылерыйскія падраздзяленні Заходняй ваеннай акругі РФ у складзе мабілізаваных навабранцаў трымаюць абарону Крамянной. Расейскія крыніцы прадаўжаюць падкрэсліваць дрэнныя ўмовы і багністы рэльеф у гэтым раёне, хоць глыбокае замярзанне, якое, паводле прагнозаў, наступіць прыкладна праз тыдзень, хутчэй за ўсё, паскорыць тэмп аперацый.

Расейскія крыніцы сцвярджалі, што 24 і 25 лістапада ўкраінскія войскі прадаўжалі контрнаступ на Крамянную. Мінабароны Расеі і іншыя расейскія крыніцы паведамілі, што ўкраінскія сілы беспаспяхова спрабавалі наступаць на Краснапапоўку і Плашчанку. Украінскі Генштаб таксама адзначыў, што расейскія войскі спрабавалі наступаць у кірунку Дзіброва. Расейскія крыніцы прадаўжалі сцвярджаць, што ўкраінскія сілы наносяць удары па расейскіх тылах па лініі Сватава – Крамянная паміж 24 і 25 лістапада.

Баі на Данбасе

Расейскія войскі прадаўжаюць засяроджваць асноўныя намаганні на вядзенні наступальных дзеянняў у Данецкай вобласці. Намеснік кіраўніка Галоўнай аператыўнай управы Генштаба Украіны брыгадны генерал Аляксей Громаў 24 лістапада заявіў, што расейскія войскі засяроджваюць намаганні ў раёне Северска, Бахмута і Аўдзееўкі з мэтай ачаплення Бахмута. Громаў заявіў, што за мінулы тыдзень на Данбасе адбылося 290 баявых сутыкненняў, з іх 90 – у раёне Бахмута. Громаў заявіў, што складаная сітуацыя ў раёне Бахмута і што расейскія сілы таксама неаднаразова спрабавалі прарваць украінскую абарону ў раёне Невельскага.

24 і 25 лістапада расейскія войскі прадаўжалі наступальныя дзеянні на Бахмуцкім кірунку. У Генштабе Украіны паведамілі, што ўкраінскія войскі адбілі расейскія штурмы паблізу Бахмута, каля Белагораўкі, Якаўлеўкі і Бахмуцкага, Андрэеўкі, Клешчыеўкі, Азаранаўкі і Вопытнага.

24 лістапада расейскія крыніцы сцвярджалі, што каля Бахмута ідуць цяжкія пазіцыйныя баі і што расейскія войскі ўсталявалі кантроль над новымі пазіцыямі на паўднёва-ўсходняй ускраіне горада. Тады ж расейскія крыніцы таксама паведамілі, што расейскія войскі закончылі зачыстку Маёрска, на поўдзень ад Бахмута.

Магчыма, уплывовыя расейскія дзеячы спрабуюць стварыць інфармацыйныя ўмовы для далейшага павольнага прасоўвання расейскіх наступальных аперацый у раёне Бахмута. Так, уладальнік ПВК «Вагнера» Яўген Прыгожын заявіў, што забараняе сваім байцам даваць інтэрв'ю пра сітуацыю ў раёне Бахмута, а таксама, што разгалашэнне жаданага за сапраўднае ў расейскіх СМІ ўводзіць у зман расейскіх вайскоўцаў і негатыўна ўплывае на аперацыі ў гэтым раёне.

Прыгожын таксама заявіў, што задача фармаванняў групы «Вагнера» ў гэтым раёне складаецца не ў тым, каб узяць Бахмут, а наадварот, дэградаваць украінскія сілы і іх баявы патэнцыял.

Нядаўнія каментары Прыгожына супярэчаць папярэдняй ацэнцы ISW, што сілы групы «Вагнера» перабольшваюць тэрытарыяльныя дасягненні вакол Бахмута і сваю адказнасць за гэтыя дасягненні, каб яшчэ больш адрозніць сябе ад проксі і звычайных расейскіх сілаў. ISW таксама раней адзначала, што сілы групы «Вагнера» не дамагліся значных поспехаў вакол Бахмута з чэрвеня. Магчыма, Прыгожын устанаўлівае інфармацыйныя ўмовы, каб абараніць сябе і ПВК «Вагнера» ад крытыкі, што вынікі іх шматмесячнага наступу на Бахмут не адпавядаюць няспынным заявам пра іх поспех і аператыўную важнасць у гэтым раёне.

24 і 25 лістапада расейскія войскі прадаўжалі наступальныя дзеянні ў раёне Аўдзееўкі. У Генштабе Украіны паведамілі, што ўкраінскія войскі 24 і 25 лістапада адбілі наступ расейцаў за 37 км на паўднёвы захад ад Аўдзееўкі ў раёне Краснагораўкі, Мар'інкі, Первамайскага і Новаміхайлаўкі. Расейскія вайсковыя блогеры таксама сцвярджалі, што 24 і 25 лістапада расейскія войскі праводзілі наступальныя дзеянні за 10 км на паўднёвы захад ад Аўдзееўкі паблізу Вадзянога.

24 і 25 лістапада Генштаб Украіны паведаміў, што расейскія войскі вядуць актыўныя абаронныя дзеянні на захадзе Данецкай і Усходзе Запарожскай абласцей. Міністэрства абароны Расеі сцвярджае, што ў гэтыя дні расейскія войскі адбілі ўкраінскія контратакі ў раёне Новаміхайлаўкі, Новаданецкага, Уладзіміраўкі, Паўлаўкі і Врэмаўкі на захадзе Данецкай вобласці і паблізу Навадараўкі і Ляваднага на ўсходзе Запарожскай вобласці ў межах 91 км на паўднёвы захад ад Данецка. У Генштабе Украіны паведамілі, што ў гэты ж перыяд расейскія войскі прадаўжалі рэгулярны агонь па ўскосным навядзенні ўздоўж лініі сутыкнення ў Данецкай і на ўсходзе Запарожскай абласцей.

Дарадца мэра Марыюпаля Пётр Андрушчанка заявіў, што расейскія войскі прадаўжаюць перасоўванне вайскоўцаў і тэхнікі ў Марыюпаль і праз яго. Ён паведаміў, што 25 лістапада ў Марыюпаль пачалі прыбываць расейскія ваенныя падмацаванні з Херсонскай вобласці.

Сітуацыя на поўдні Украіны

24 і 25 лістапада расейскія войскі прадаўжалі ўзводзіць абарончыя пазіцыі і ўмацаванні ў Херсонскай вобласці на поўдзень ад ракі Дняпро. Украінскі Цэнтр Супраціву паведаміў, што расейскія ўлады завозяць цывільных асобаў з Марыюпаля для будаўніцтва ўмацаванняў ва ўсходняй Херсонскай вобласці, што паказвае на тое, што расейскім войскам у гэтым раёне не стае колькасці мабілізаванага персаналу, неабходнага для будаўніцтва ўмацаванняў у хуткасцях і маштабах, жаданых кіраўніцтвам.

«Прымус цывільных грамадзянаў Украіны да выканання ваенных задачаў ад імя расейскіх кафіраў, у тым ліку да будаўніцтва фартыфікацыйных збудаванняў, будзе парушэннем артыкула 40 Жэнеўскай канвенцыі пра абарону цывільнага насельніцтва падчас вайны», – адзначаюць аналітыкі.

25 лістапада расейскі вайсковы блогер заявіў, што расейская дыверсійна-выведная група здзейсніла кароткі налёт на ўкраінскія пазіцыі на правым беразе ракі Дняпро ў Антонаўцы, але гэтае сцвярджэнне малаверагоднае, і ISW не можа пацвердзіць дакладнасць гэтага паведамлення.

Украінскія і расейскія крыніцы паведамлялі, што ўкраінскія сілы наносілі ўдары па расейскіх войсках уздоўж усходняга берагу ракі Дняпро ў раёне Новай Кахоўкі, Кахоўкі і Любімаўкі, а таксама ў расейскім тыле ў Чаплінцы і Скадоўску.

Прадстаўнік Галоўнай управы выведкі Украіны Андрэй Чарняк заявіў, што расейскія войскі ствараюць абаронныя раёны ўздоўж адмінмяжы Херсонскай вобласці і Крыма, у тым ліку на двух адцінках на поўначы Джанкойскага раёна. Дэпутат Херсонскай аблрады Сяргей Хлань заявіў, што расейскія войскі ўзмацняюць мілітарызацыю Арабацкай касы на ўсход ад асноўнага Крымскага паўвострава і Перакопскага пярэсмыка і сканцэнтравалі на касе ваенныя гелікоптары і мабілізаваны персанал.

24 і 25 лістапада расейскія войскі прадоўжылі звычайныя артылерыйскія і ракетныя абстрэлы на захад ад Гуляйполя, а таксама ў Мікалаеўскай і Днепрапятроўскай абласцях. Таксама ўкраінскія і расейскія крыніцы сцвярджаюць, што расейскія войскі нанеслі ўдары па г. Запарожжа, Ачакаў Мікалаеўскай вобласці, Нікаполь і Марганец Днепрапятроўскай вобласці.

Таксама аналітыкі адзначаюць, што ў Расеі, хутчэй за ўсё, правядуць другую хвалю «долевай мабілізацыі», а пакуль праблемы з забеспячэннем войска прарываюцца ў інфапрасторы расейцаў.