WSJ: У Кітая пачаліся значныя праблемы

Попыт на кітайскі экспарт падае.

Нядаўнія намаганні ўлад Кітая ў карэктаванні мер кантролю над Covid-19 і ажыўленню актыўнасці на разбітым рынку нерухомасці выклікалі надзею, што кітайскі лідар Сі Цзіньпін робіць новы акцэнт на мерах падтрымкі эканомікі, што патэнцыйна прывядзе да моцнага аднаўлення росту ў наступным годзе. Але эканамісты папярэджваюць, што гэтыя крокі ўсё яшчэ не абумовілі істотных змен у палітыцы Сі. У той час як чакаецца, што эканоміка Кітая крыху адновіцца ў 2023 годзе пасля значнага спаду ў гэтым годзе, большасць эканамістаў сумняваюцца, што неўзабаве яна вернецца да імклівага росту перадпандэмічных дзён, падае артыкул WSJ «Люстэрка тыдня. Украіна».

У кароткатэрміновай перспектыве попыт на кітайскі экспарт падае, бо заходнія спажыўцы скарачаюць выдаткі. Некаторыя гарады аднаўляюць строгія меры кантролю над Covid праз рэзкі рост колькасці выпадкаў захворвання. І продажы жылля, няўдалыя на працягу месяцаў, працягваюць падаць, нягледзячы на зніжэнне іпатэчных ставак і іншыя меры.

У пятніцу цэнтральны банк Кітая заявіў, што ён зменшыць суму рэзерваў, якія банкі павінны захоўваць пад свае дэпазіты, каб павялічыць крэдытаванне хатніх гаспадарак і прадпрыемстваў, але эканамісты заявілі, што гэты крок, магчыма, будзе мець абмежаваны ўплыў праз слабы апетыт да новых пазык.

У доўгатэрміновай перспектыве Кітай сутыкаецца з іншымі праблемамі, у тым ліку старэнне насельніцтва, высокі ўзровень пазыкі і ціск з боку ЗША, якія спрабуюць абмежаваць доступ Кітая да паўправаднікаў і іншых тэхналогій.

Нягледзячы на тое, што эканамісты Goldman Sachs прагназуюць невялікі рост эканомікі Кітая ў другой палове 2023 года, паколькі будзе скасаваная большаць мер кантролю за COVID-19, яны бачаць рост толькі блізу 4% - значна ніжэй за ўзровень да пандэміі, калі рост склаў у сярэднім 8,6% за дзесяцігоддзе да 2019 года.

Луіс Куіс, галоўны эканаміст Азіяцка-Ціхаакіянскага рэгіёну S&P Global Ratings, прагназуе сярэднегадавы рост на 4,4% з сённяшняга дня да 2030 года, а затым спад да 3,1% у наступным дзесяцігоддзі. Ён звяртае ўвагу на скарачэнне насельніцтва працаздольнага ўзросту ў Кітаі і рост геапалітычнай напружанасці.

Рэпрэсіі ўрада супраць прыватных інтэрнэт-кампаній летась, часткова абумоўленыя жаданнем скараціць назапашванне багацця ў тэхналагічным сектары, прывялі да страты працоўных месцаў, што абумовіла гэтым летам павелічэнне беспрацоўя сярод гарадской моладзі ў Кітаі амаль да 20%. Гэта таксама заахвоціла многія кампаніі прыватнага сектара скараціць выдаткі.

У аўторак JD.com Inc., адна з найбуйнейшых платформаў электроннай камерцыі ў Кітаі, заявіла, што на наступны год плануе скараціць заробкі блізу 2 000 мэнэджараў на 10-20%, каб дапамагчы палепшыць выплаты працаўнікам.

Нявызначанасць усё яшчэ лунае вакол сектара нерухомасці, на які прыпадае прыкладна чвэрць агульнай эканамічнай дзейнасці Кітая. Хоць апошнія меры Пекіна могуць дапамагчы забудоўшчыкам пазбегнуць дэфолтаў і знізіць рызыку фінансавага заражэння, яны не мелі прамога ўплыву на стымуляванне пакупкі жылля, адзначыў Цін Лу, галоўны эканаміст Nomura з Кітая.

Перанасычэнне жыллём дадае праблем. Разалія Яо, аналітык даследчай фірмы Gavekal Dragonomics, падлічыла, што Кітаю спатрэбіцца прыкладна 20 месяцаў, каб прадаць свой запас непрададзенага жылля, які складае больш за 2,2 мільярды квадратных метраў.

Хоць Сі Цзіньпін імкнецца не дапусціць значнага пагаршэння эканамічнага спаду ў Кітаі, ён мяркуе, што занадта хуткі рост можа пагоршыць фінансавы дысбаланс у эканоміцы і павялічыць прорву паміж багатымі і беднымі. На нядаўнім з'ездзе Камуністычнай партыі Кітая, дзе ён атрымаў яшчэ пяць гадоў улады, спадар Сі выклаў эканамічны парадак дня, засяроджаны на такіх прыярытэтах, як павышэнне самазабяспечанасці Кітая харчаваннем, энэргіяй і высокатэхналагічнымі таварамі; стрымліванне пазыкі і пераразмеркаванне багацця ў рамках праграмы, вядомай як «агульны росквіт». Эканамісты гавораць, што гэтыя мэты, хоць і патэнцыйна карысныя для Кітая, могуць перашкодзіць прадукцыйнасці, перашкаджаць прыватным інвестыцыям і перашкаджаць росту працоўных месцаў.