Кітайскі «наморднік» на Пуціне

Як Пекін пазбавіў Расею ядзернай рыторыкі.

Міжнародны аглядальнік Іван Якавіна ў эфіры «Радыё НВ» патлумачыў, як праблемы ў Кітаі паўплывалі на вайну Расеі ва Украіне, а менавіта ўціхамірылі агрэсіўную рыторыку Крамля аб ужыванні ядзернай зброі.

Кітайская Народная Рэспубліка, асабліва Кампартыя са сваім лідарам Сі Цзіньпінам, цяпер сутыкнулася з праблемамі. Сапраўды ў іх гіганцкія праблемы ў эканоміцы і з уласным насельніцтвам, якому ўсё менш і менш падабаецца палітыка нулявой цярпімасці ў стаўленні да каранавіруса.

І пачало насельніцтва бунтаваць, а эканоміка пачала руйнавацца. Каб справіцца з першай праблемай, патрэбная ў вялікай колькасці вакцына. Каб справіцца з другой праблемай - з эканомікай, патрэбная фінансавая дапамога ці хаця б неўмяшанне, адсутнасць перашкод з боку Захаду.

Пра гэта Сі Цзіньпін размаўляў з прэзідэнтам ЗША Джо Байдэнам чатыры з паловай гадзіны на саміце Вялікай дваццаткі на Балі. І, відаць, яны дамовіліся. Я ўпэўнены, што сапраўды дамовіліся. Заплаціць за іх дамоўленасць хутчэй за ўсё РФ і Уладзімір Пуцін.

Я раней казаў пра тое, што Кітай, Індыя, Турцыя выставілі Уладзіміру Пуціну ўльтыматум яшчэ ў сярэдзіне верасня: калі ён не спыніць вайну да саміту Вялікай дваццаткі на Балі ў сярэдзіне лістапада, то калектыўны Усход, гэта значыць, Індыя, Турцыя, Кітай альбо пачнуць уводзіць санкцыі супраць РФ, альбо далучацца да заходніх санкцый. Гэта значыць, вельмі балюча, вельмі жорстка стукнуць па Пуціну, будуць яго прымушаць ужо, а не прасіць, спыніць вайну як мага хутчэй.

Чаму гэта патрэбна краінам Усходу? Таму што вайна выціскае сокі з іхняй эканомікі, перашкаджае развівацца іх прамысловасці, а таксама падрывае сацыяльную стабільнасць у гэтых краінах. Таму яны і запатрабавалі ў Пуціна спыніць вайну як мага хутчэй усякім спосабам.

Пуцін гэтага не зрабіў, і таму цяпер Усход пачынае ўводзіць уласныя санкцыі супраць РФ.

Кітай фактычна прымусіў РФ забыцца пра ядзерную зброю і пра пагрозы яе выкарыстання. Важны момант трэба адзначыць: Уладзімір Пуцін любіць і хоча жыць. Ён не псіх і не фанатык, ядзерная зброя для яго толькі спосаб дасягнення мэты, ён не марыць аб ядзерным апакаліпсісе. Калі б марыў, мусіць, ужо б яго ажыццявіў.

Тактычную ядзерную зброю, брудную бомбу супраць Украіны Пуцін з лёгкасцю можа ўжыць, ён шмат разоў пра гэта казаў. Але ў тэрмаядзерную вайну супраць ЗША ён уступаць не гатовы. Не збіраецца ён паміраць і хаваць усю сваю сям'ю, не жадае гэтага.

Пагроза выкарыстаць тактычную ядзерную зброю супраць Украіны доўгі час была галоўным сродкам запалохвання Захаду і галоўным сродкам ціску з боку Расеі на калектыўны Захад.

Увесну ў РФ абмяркоўвалі магчымасць ядзернага ўдару па Украіне - Newsweek

Многія часта пыталіся і пытаюцца: «Чаму Захад не дае Украіне танкі, знішчальнікі, сістэмы СПА Patriot, ракеты ATACMS, самыя цяжкія тыпы ўзбраення? Даўно ж пара гэта зрабіць! Я, дарэчы, згодзен, сапраўды даўно пара даць. Але Захад гэтага не робіць праз сталыя пагрозы Расеі нанесці тактычны ядзерны ўдар па гэтых танках, па гэтых самалётах, проста па ўкраінскіх гарадах. Расея кажа, я падазраю, праз нейкія закрытыя каналы: «Калі вы пачняце перадаваць Украіне цяжкае ўзбраенне, у нас не будзе іншага выбару, акрамя як нанесці такі ядзерны ўдар». Паколькі перадача такіх цяжкіх узбраенняў будзе ўжо пагрозай для існавання РФ.

Пагрозу выкарыстання Расеяй ядзернай зброі трэба было неяк прыбраць, нівеліраваць, ліквідаваць. Для гэтага Захаду і спатрэбіўся Кітай і Сі Цзіньпін. Бо менавіта Кітай з'яўляецца фактычна адзінай краінай, якая вось так можа паўплываць на Уладзіміра Пуціна і прымусіць яго рабіць нешта ці нешта не рабіць.

Таму забарона пагроз ужывання ядзернай зброі з боку Кітая на адрас Расеі - гэта можна назваць галоўнай амерыканскай санкцыяй. Гэта значыць, амерыканцы запатрабавалі ад Кітая, каб Кітай забараніў Пуціну нават размовы весці аб ужыванні ядзернай зброі. І вы ведаеце, што Пуцін спыніў.

Глядзіце, што атрымалася, калі гэтую сітуацыю ў комплексе разглядаць. У першыя дні буйнамаштабнай вайны Пуцін намякнуў, што «мы атакуем тых, хто паспрабуе нам перашкодзіць, ядзернымі бомбамі».

Потым ён пагражаў выкарыстаць усе сродкі для абароны акупаваных тэрыторый Украіны. Гэта ён казаў яшчэ 21 верасня, не так даўно, калі абвяшчаў аб масавай мабілізацыі.

Акрамя таго ён пагражаў заходнім краінам нейкай «ружай вятроў», якая можа падзьмуць у іх кірунку. Карацей кажучы: пагражаў заходняму свету заражэннем радыеактыўнымі адкідамі або прадуктамі радыеактыўнага распаду пасля выкарыстання ядзернай бомбы на тэрыторыі Украіны. Пуцін казаў, што гэта не блеф.

А потым, яшчэ праз месяц, правёў вучэнні стратэгічных ядзерных сіл «Гром-2022», у якім імітаваўся пачатак ядзернай вайны. Намеснік кіраўніка Савета бяспекі РФ Дзмітрый Мядзведзеў, гэты п'яны псіхапат, 27 верасня заявіў, што Расея мае права ўжыць ядзерную зброю, калі гэта будзе неабходна. Акрамя таго, ён сказаў, што будзе ўжывацца ядзерная бомба супраць украінскага рэжыму, і што NATO ў гэтым выпадку ўмешвацца не будзе, для бяспекі Вашынгтона і Бруселя не будзе NATO ўмешвацца.

1 лістапада, за тыдзень да здачы Херсона, Мядзведзеў абвясціў, што «адрынванне расейскіх тэрыторый стане падставай для ўжывання ядзернай дактрыны».

Вось яны ўсе казалі «ядзерная зброя, ядзерная зброя» з раніцы да вечара, а потым на саміце АСЕАН 10-13 лістапада кіраўнік кітайскай дэлегацыі, прэм'ер-міністр Кітая Лі Кэцян выступіў з крытыкай ядзернай рыторыкі. Назваў безадказнымі пагрозы выкарыстання ядзернай зброі. Потым і Сі Цзіньпін некалькі разоў казаў, што ні ў якім разе ў Еўропе нельга ўжываць атамную бомбу.

А падчас саміту Вялікай дваццаткі на Балі адзіным замежным прадстаўніком, з якім сустрэўся кіраўнік МЗС РФ Сяргей Лаўроў, быў кітайскі міністр замежных спраў Ван І. І ён, мяркуючы з усяго, перадаў праз Лаўрова Пуціну, што «ты рот закрый, калі ласка, і наогул сядзі і маўчы, бо мы табе зладзім вельмі нядобрае жыццё». І ўсё. Пасля вокрыку з Кітая ні разу ні Пуцін, ні Мядзведзеў [не заікнуліся аб ядзернай зброі].

А спыненне ядзернай рыторыкі і тым больш пагроз ужывання ядзернай зброі было галоўным патрабаваннем ЗША. Таму што амерыканцаў вельмі турбуюць сталыя размовы аб ужыванні магчымай ядзернай зброі. І амерыканскі ўрад, і амерыканскія эліты прыходзяць ад гэтага ў нервовы стан. І яны сказалі кітайцам: «Заткніце гэтага дурня». Кітайцы праз Лаўрова і Ван І заткнулі. Звярніце ўвагу, Расея нічога больш не гаворыць пра выкарыстанне ядзернай зброі.

Акрамя таго, Кітай значна скараціў і закупы расейскай нафты. Кітай адмовіўся пастаўляць у ранейшых аб'ёмах у Расею мікрачыпы. Дарэчы, нават аўтамабілі для расейскага ДАІ, для ДІБДР яны хацелі набыць у кітайцаў, кітайцы не прадалі.

То бок вось такія санкцыі кітайцы ўвялі. Але галоўнае, вядома, ядзерная гісторыя, гэта фундаментальна важны момант: у атрутнай змяі, якая ўсім паказвала сваё джала, у яе гэта джала вырвалі.

Вядома, Расея ўсё адно яшчэ ўяўляе, як змяя, вось гэтую небяспеку, але галоўнай зброі ўжо няма. Гэта значыць, роля Кітая і кітайскай гэтай санкцыі, калі так можна назваць, ва ўціхамірванні Уладзіміра Пуціна проста вялізная. Яна надта важная.

Таму, думаю, амерыканцы цяпер не дадуць пайсці Сі Цзіньпіну на дно, дапамогуць яму грашыма, можа, вакцынамі, можа, яшчэ нешта паабяцаюць. Таму што для амерыканцаў Сі Цзіньпін цяпер выконвае вельмі важную функцыю намордніка на Уладзіміры Пуціне.