У Беларусі зноў падоўжылі абмежаванні ў трох раёнах Гомельскай вобласці

У мэтах бяспекі.

Дзеянне ўведзеных раней абмежаванняў на знаходжанне грамадзян у памежнай палосе на тэрыторыі трох раёнаў Гомельскай вобласці падоўжанае да 1 сакавіка 2023 года. Аб гэтым паведаміла прэсавая служба Дзяржаўнага памежнага камітэта Беларусі.

"У мэтах гарантавання памежнай бяспекі дзейнічаюць часовыя абмежаванні ўезду (уваходу), часовага знаходжання грамадзян у памежнай паласе на тэрыторыі Брагінскага, Лоеўскага і Хойніцкага раёнаў Гомельскай вобласці", — паведамілі ў ДПК.

Таксама падоўжанае прыпыненне выдачы пропускаў у памежную паласу на тэрыторыі названых раёнаў Гомельшчыны.

Абмежаванні не распаўсюджваюцца на ўласнікаў зямельных дзялянак, памежнікаў і асоб, якія выконваюць службовыя абавязкі.

Нагадаем, рэстрыкцыі ўводзіліся для "гарантавання памежнай бяспекі". Першапачаткова яны дзейнічалі з 1 чэрвеня да 31 жніўня, пасля іх падоўжылі да 1 снежня.