Нафтавыя даходы расейскага бюджэту абрынуліся на 25%

Нафтавікам РФ даводзіцца павялічваць збаўкі для астатніх кліентаў у Індыі, Кітаі ды Турцыі.

Даходы федэральнага бюджэту Расеі ад здабычы і экспарту нафты зніжацца далей у той час як нафтавікам даводзіцца павялічваць збаўкі на барэлі для астатніх кліентаў у Індыі, Кітаі ды Турцыі.

За лістапад Міністэрства фінансаў сабрала з нафтавых кампаній 527,8 млрд рублёў падатку на здабычу карысных выкапняў (ПЗКВ) – на 24% менш, чым у тым жа месяцы годам раней, вынікае з аперацыйнай статыстыкі міністэрства.

Паступленні экспартнай мыты на "чорнае золата" абрынуліся амаль на 40% - 41,8 млрд рублёў у мінулым месяцы супраць 68,5 млрд рублёў у лістападзе-2021. Агулам на нафце бюджэт зарабіў за месяц 569,6 млрд рублёў - на 25%, чым годам раней (763,5 млрд).

Агульны аб'ём нафтагазавых даходаў скарбу знізіўся нязначна - на 2,1% у гадавым вылічэнні, да 866,4 млрд рублёў. Аднак гэты вынік цалкам тлумачыцца падвышанымі зборамі з «Газпрома», якому ўлады загадалі выплаціць у бюджэт 1,2 трыльёна рублёў падвышанага ПЗКВ у чацвёртым квартале.

Штомесяц кампанія пералічвае ў бюджэт 415 млрд рублёў, задавальняючы патрэбы ўрада ў грошах за кошт прыбытку мінулага года. Без гэтых разавых паступленняў нафтагазавыя даходы абрынуліся б на "аглушальныя" 49%, падлічылі аналітыкі MMI.

У бюджэт-2023 Мінфінансаў заклала скарачэнне даходаў ад нафты і газу на 24% - з 11,666 да 8,939 трлн рублёў. Пры гэтым, нягледзячы на еўрапейскае эмбарга, якое ўваходзіць у дзеянне, міністэрства чакае толькі нязначнага скарачэння здабычы нафты (на 5%), а ў яе экспарце плануе рост - з 243 да 250 млн тон.

Каб збалансаваць бюджэт-2023, патрэбная нафта за 95 даляраў за барэль, ацэньвае Наталля Арлова, галоўная эканамістка Альфа-банка. Мінфінансаў заклала ў бюджэт сярэднюю цану на ўзроўні 70 даляраў і дэфіцыт 3 трыльёны рублёў.

У рэальнасці дэфіцыт можа стацца вышэйшым за план — блізу 3,4 трыльёна рублёў, прагназуе Арлова. «Значныя экспартныя даходы 2022 года будзе амаль немагчыма захаваць на гарызонце 2023 года. Экспарт сырой нафты можа пацярпець, улічваючы ўвядзенне граніцы цаны нафты са снежня і зніжэнне паставак у ЕЗ. Экспарт нафтапрадуктаў, які сутыкнецца з абмежаваннямі са студзеня-сакавіка 2023 года, складана будзе перанакіраваць з ЕЗ у Азію з прычыны нізкага попыту на гэтыя тавары на азіяцкіх рынках», - зазначае яна.