Больш за мільён чалавек з'ехалі з Расеі пасля пачатку вайны

Расейцы, якія ўцякалі ад вайны і набору ў войска, пазапаўнялі постсавецкія краіны.

Вайна з Украінай і масавая мабілізацыя разбудзілі хвалю эміграцыі з Расеі ў маштабах, не бачаных з раскідання СССР.

Блізу 1,1 мільёна чалавек маглі пакінуць краіну за першыя дзевяць месяцаў 2022 года. Такую ацэнку ў аглядзе расейскай эканомікі дае Цэнтр макраэканамічнага аналізу Альфа-банка, паведамляе The Moscow Times.

Згодна з Расстат, толькі ў трэцім квартале колькасць выездаў грамадзян за мяжу павялічылася на 1,2 мільёна, да 9,7 мільёна. Пры гэтым Казахстан і Грузія з’яўляюцца двума асноўнымі кірункамі павелічэння колькасці выездаў: колькасць выпраў у гэтыя краіны вырасла на 1 мільён і 400 тысяч адпаведна.

З улікам першай хвалі эміграцыі ў лютым і сакавіку расейская эканоміка магла пазбавіцца да 1,5% усёй працоўнай сілы, ацэньвае Альфа-банк. Яе колькасць, паводле звестак Міністэрства эканамічнага развіцця, вагаецца каля адзнакі 75 мільёнаў чалавек.

Эканамісты Bloomberg Eсonomics ацэньваюць страты яшчэ вышэй - да 2% працоўнай сілы, або 1,5 мільёна чалавек можа страціць Расея да канца года ў выніку эміграцыі і мабілізацыі, якая закранула 300 тысяч грамадзян. Гэта зніжае патэнцыйныя тэмпы росту эканомікі да нікчэмных 0,5% за год, што ўдвая ніжэй за і без таго нізкі даваенны ўзровень (1%), папярэджвае BE.

Расейцы, якія ўцякалі ад вайны і набору ў войска, пазапаўнялі постсавецкія краіны. Паводле звестак Headhunter, колькасць аб'яў аб пошуку працы, размешчаных грамадзянамі РФ, у Казахстане ўзляцела на 81%, у Грузіі ды Узбекістане - на 59%, у Кіргізстане - на 55%, у Арменіі - на 44%.

Гэта абяцае эканоміцы дэфіцыт кадраў, які ў прамысловасці ўжо дасягнуў рэкордных значэнняў за ўсю гісторыю даступнай статыстыкі (з 1993 года), паказала апытанне Інстытута Гайдара: кожнае трэцяе прадпрыемства скардзіцца на нястачу працоўных рук, а кожнае другое канстатуе немагчымасці павялічыць выраб, нават калі знойдзецца попыт.

Сітуацыю пагаршае дэмаграфія. У групе ад 20 да 24 гадоў у Расеі цяпер толькі 7 мільёнаў чалавек супраць 12 мільёнаў 10 гадоў таму, зазначае Наталля Даніна, кіраўніца аналітычнага дэпартамента Headhunter.

«Гэта жахлівыя лічбы, - наракае яна. - У дадатак шмат у каго могуць быць праблемы са здароўем дзеля стрэсу. (У краіне) проста фізічна не стае людзей» (цытаты паводле Bloomberg).

З'язджаючы за мяжу, людзі вывозяць з сабой грошы. Не менш як 36 млрд даляраў пакінулі Расею за студзень-верасень: у выніку сума сродкаў фізічных асоб на рахунках у замежных банках дасягнула 66 млрд даляраў і ўпершыню перасягнула суму, якая захоўваецца на валютных рахунках у РФ (63 млрд).

«Міграцыйны адток суправаджаецца адтокам прыватнага капіталу. Дадатковы аспект у тым, што міграцыйны адток, мяркуючы з усяго, адлюстроўвае адток сярэдняга класа», - адзначае галоўная эканамістка Альфа-банка Наталля Арлова.