Стала вядома, якую ролю Крэмль адвёў беларускім сілавікам у плане захопу Украіны

Даклад брытанскіх аналітыкаў.

Сайт Charter97.org пісаў, што Каралеўскі аб'яднаны інстытут абаронных даследаванняў Вялікай Брытаніі (RUSI) апублікаваў вялікі даклад аб ходзе расейскага ўварвання ва Украіну з лютага да ліпеня. Як выявілася, у плане Крамля была прапісаная і роля беларускіх сілавікоў.

Расея, згодна з дакладам RUSI, планавала захапіць Украіну за 10 дзён і падрыхтаваць анэксію да жніўня (сімвалічна, бо ў жніўні Дзень незалежнасці Украіны).

Расейская контрвыведка падрыхтавала спісы:

1) украінскіх грамадзян, якія павінны быць фізічна ліквідаваныя;

2) рэпрэсаваныя;

3) нейтралаў, якіх можна было б схіліць да калабарацыянізму;

4) калабарантаў.

Прэзідэнта Зяленскага і вышэйшае кіраўніцтва планавалася забіць. Чальцоў урада - пасадзіць. Прарасейскія парламентарыі павінны былі сфармаваць «Рух за мір».

Пасля паражэння ўкраінскага войска і знішчэння палітычнага і вайсковага кіраўніцтва Украіны краіна павінна была страціць волю да перамогі і здацца.

Крытычную інфраструктуру, згодна з планам, планавалася захапіць у цэласці - як і парламент, Цэнтрабанк і аб'екты атамнай энэргетыкі (прычым украінская выведка мяркуе, што Ровенскую і Хмяльніцкую АЭС меркавалася браць пад кантроль сіламі спецаперацый Беларусі).