Ці знікне еўра з беларускіх абменнікаў?

Тлумачыць эканаміст.

Нацбанк Беларусі анансаваў выключэнне еўра з кошыка замежных валют. Эканаміст Леў Марголін у каментары сайту Charter97.org распавёў, што гэта азначае для беларусаў.

- Гэта азначае, што фіксуецца рэальны стан рэчаў. Кошык звычайна складаецца з тых валют, якія найбольш запатрабаваныя на рынку. Да пачатку гэтага года большасць разлікаў у нашай краіне за імпарт ці экспарт праводзіліся ў далярах, еўрах і расейскіх рублях, таму менавіта гэтыя валюты былі ў складзе кошыка. Прычым іх удзельная вага там прыкладна адпавядала або карэлявала з удзельнай вагай у замежнагандлёвым абарачэнні.

Пасля пачатку вайны ва Украіне і ўвядзення санкцый супраць беларускай эканомікі склалася такая сітуацыя, што экспарт і імпарт пераарыентаваліся на Расейскую Федэрацыю. І калі даляр ЗША з'яўляецца больш універсальнай валютай і дастаткова значнае абарачэнне аплачваецца далярамі, то доля еўра ўпала настолькі, што няма сэнсу звязваць курс беларускага рубля з курсам еўра. Але мы ведаем, што ў склад кошыка ўведзены кітайскі юань. Наш нацыянальны рэгулятар вызначыў, што расейскага рубля, даляра і юаня дастаткова для таго, каб падтрымліваць і вызначаць узровень беларускага рубля.

- Ці могуць беларусы сутыкнуцца з тым, што з'явіцца абмежаванне на продаж або куплю замежнай валюты, як гэта было ў Расеі ў пачатку вайны?

- Думаю, што не. У РФ гэтая сітуацыя была звязаная з тым, што была забарона на ўвоз гатоўкі. А Расея — краіна дастаткова вялікая, насельніцтва там вялікае. Проста ўвозу фізічнымі асобамі валюты было відавочна недастаткова, таму банку давялося ўводзіць абмежаванні. У Беларусі пакуль такіх абмежаванняў няма, я не думаю, што яны з'явяцца надалей.

Што ж тычыцца ўвогуле лёсу еўра, яго наяўнасці ў абменніках і гэтак далей, то гэта больш залежыць ад пазіцый камерцыйных банкаў. Але ўлічваючы, што яны кіруюцца найперш жаданнем атрымліваць прыбытак, то калі не будзе нейкіх дадатковых указанняў ад Нацбанку, камерцыйныя банкі прадоўжаць працу з еўра, як яны рабілі гэта і раней.

Што да наяўнага грашовага абарачэння, то не трэба забываць, што вельмі вялікая колькасць беларусаў працуе ў еўрапейскіх краінах, прынамсі, Літве, дзе еўра з'яўляецца афіцыйнай валютай. Многія грамадзяне пераводзяць і прывозяць у Беларусь наяўныя еўра, таму абарачэнні з гэтай валютай будуць дастаткова вялікія.

Калі вам спадабаўся артыкул, вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL 97 1160 2202 0000 0002 1671 1123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com